bante hain roz roz fasane nae nae

bante haiñ roz roz fasāne na.e na.e

hote haiñ log roz divāne na.e na.e

ā.eñge is ke baa'd zamāne na.e na.e

barbādiyoñ ke hoñge nishāne na.e na.e

tanhā.iyoñ meñ khod ke dil aur dimāġh ko

naġhmoñ ke paa.e ham ne ḳhazāne na.e na.e

mahfil vahī hai sham' bhī parvāne bhī vahī

aate haiñ log rang jamāne na.e na.e

vāqif nahīñ haiñ 'ishq ke rasm-o-rivāj se

ham to hue haiñ tere divāne na.e na.e

ġham se hī dil meñ aa.egī jazbāt par bahār

nikleñge phuul ban ke tarāne na.e na.e

har mah-jabīñ ke nāz-o-adā haiñ alag alag

milte haiñ 'āshiqī ke bahāne na.e na.e

mai-ḳhāna band ho gayā 'sāqī' to kyā huā

kar leñge mai-gusār Thikāne na.e na.e

bante hain roz roz fasane nae nae

hote hain log roz diwane nae nae

aaenge is ke ba'd zamane nae nae

barbaadiyon ke honge nishane nae nae

tanhaiyon mein khod ke dil aur dimagh ko

naghmon ke pae hum ne KHazane nae nae

mahfil wahi hai sham' bhi parwane bhi wahi

aate hain log rang jamane nae nae

waqif nahin hain 'ishq ke rasm-o-riwaj se

hum to hue hain tere diwane nae nae

gham se hi dil mein aaegi jazbaat par bahaar

niklenge phul ban ke tarane nae nae

har mah-jabin ke naz-o-ada hain alag alag

milte hain 'ashiqi ke bahane nae nae

mai-KHana band ho gaya 'saqi' to kya hua

kar lenge mai-gusar Thikane nae nae