barae-dilkashi lafz-o-maani mang leta hai

barā.e-dilkashī lafz-o-ma.ānī maañg letā hai

qalam se roz kāġhaz ik kahānī maañg letā hai

shab-e-furqat meñ jab dil Duub jaatā hai udāsī meñ

tire rangīñ tasavvur se javānī maañg letā hai

bhulā detā hai azmat pyaas meñ apnī samundar bhī

baḌhā kar haath dariyāoñ se paanī maañg letā hai

charāġh-e-rahguzar huuñ maiñ haqīqat hai magar ye bhī

kabhī sūraj bhī mujh se zau-fishānī maañg letā hai

rahe ye baat bhī pesh-e-nazar zill-e-ilāhī ke

falak de kar zamīñ kī hukmrānī maañg letā hai

bharosa kījiye kis kī atā par ai 'kamāl-anvar'

ḳhudā bhī ham se vāpas zindagānī maañg letā hai

barae-dilkashi lafz-o-maani mang leta hai

qalam se roz kaghaz ek kahani mang leta hai

shab-e-furqat mein jab dil Dub jata hai udasi mein

tere rangin tasawwur se jawani mang leta hai

bhula deta hai azmat pyas mein apni samundar bhi

baDha kar hath dariyaon se pani mang leta hai

charagh-e-rahguzar hun main haqiqat hai magar ye bhi

kabhi suraj bhi mujh se zau-fishani mang leta hai

rahe ye baat bhi pesh-e-nazar zill-e-ilahi ke

falak de kar zamin ki hukmrani mang leta hai

bharosa kijiye kis ki ata par ai 'kamal-anwar'

KHuda bhi hum se wapas zindagani mang leta hai