barae-nam sahi koi mehrban to hai

barā.e-nām sahī koī mehrbān to hai

hamāre sar pe bhī hone ko āsmān to hai

tirī farāḳh-dilī ko duā.eñ detā huuñ

mire laboñ pe tire lams kā nishān to hai

ye aur baat ki vo ab yahāñ nahīñ rahtā

magar ye us kā basāyā huā makān to hai

siroñ pe sāya-fagan abr-e-ārzū na sahī

hamāre paas sarāboñ kā sā.ebān to hai

alāva us ke na kuchh aur parda rakh mujh se

fasīl-e-jism mire tere darmiyān to hai

bichhaḌ ke zinda nahīñ rah sakeñge ham donoñ

mujhe ye vahm to hai un ko ye gumān to hai

bhalī-burī sahī maujoñ meñ apnī naav to hai

kaTā-phaTā sahī kahne ko bādbān to hai

gul-e-murād nahīñ sañg-hā-e-tifl sahī

ġharīb-e-shahr kā āḳhir kisī ko dhyān to hai

barae-nam sahi koi mehrban to hai

hamare sar pe bhi hone ko aasman to hai

teri faraKH-dili ko duaen deta hun

mere labon pe tere lams ka nishan to hai

ye aur baat ki wo ab yahan nahin rahta

magar ye us ka basaya hua makan to hai

siron pe saya-fagan abr-e-arzu na sahi

hamare pas sarabon ka saeban to hai

alawa us ke na kuchh aur parda rakh mujh se

fasil-e-jism mere tere darmiyan to hai

bichhaD ke zinda nahin rah sakenge hum donon

mujhe ye wahm to hai un ko ye guman to hai

bhali-buri sahi maujon mein apni naw to hai

kaTa-phaTa sahi kahne ko baadban to hai

gul-e-murad nahin sang-ha-e-tifl sahi

gharib-e-shahr ka aaKHir kisi ko dhyan to hai