baras gaya ba-KHarabaat-e-arzu tera gham

baras gayā ba-ḳharābāt-e-ārzū tirā ġham

qadah qadah tirī yādeñ subū subū tirā ġham

tire ḳhayāl ke pahlū se uTh ke jab dekhā

mahak rahā thā zamāne meñ chār-sū tirā ġham

ġhubār-e-rañg meñ ras DhūñDhtī kiran tirī dhun

giraft-e-sañg meñ bal khātī āb-e-jū tirā ġham

nadī pe chāñd kā partav tirā nishān-e-qadam

ḳhat-e-sahar pe añdheroñ kā raqs tū tirā ġham

naḳhīl-e-zīst kī chhāñv meñ nai-ba-lab tirī yaad

fasīl-e-dil kī kalas par sitāra-jū tirā ġham

tulū-e-mahr shagufta sahar siyāhī-e-shab

tirī talab tujhe paane kī aarzū tirā ġham

nigah uThī to zamāne ke sāmne tirā ruup

palak jhukī to mire dil ke rū-ba-rū tirā ġham

baras gaya ba-KHarabaat-e-arzu tera gham

qadah qadah teri yaaden subu subu tera gham

tere KHayal ke pahlu se uTh ke jab dekha

mahak raha tha zamane mein chaar-su tera gham

ghubar-e-rang mein ras DhunDhti kiran teri dhun

giraft-e-sang mein bal khati aab-e-ju tera gham

nadi pe chand ka partaw tera nishan-e-qadam

KHat-e-sahar pe andheron ka raqs tu tera gham

naKHil-e-zist ki chhanw mein nai-ba-lab teri yaad

fasil-e-dil ki kalas par sitara-ju tera gham

tulu-e-mahr shagufta sahar siyahi-e-shab

teri talab tujhe pane ki aarzu tera gham

nigah uThi to zamane ke samne tera rup

palak jhuki to mere dil ke ru-ba-ru tera gham