barbaad-e-mohabbat ho kar bhi jine ka sahaara ho na saka

barbād-e-mohabbat ho kar bhī jiine kā sahārā ho na sakā

ik dil pe bharosa thā apne vo bhī to hamārā ho na sakā

jalvoñ kī farāvānī tauba dam bhar meñ huiiñ ḳhīra nazreñ

vo sāmne be-parda the magar ham se hī nazāra ho na sakā

āñkhoñ kī zabānī shikva-e-ġham karnā thā bahut un se lekin

ḳhud husn pashemāñ ho jaatā ye ham se gavārā ho na sakā

maanā ki bharī mahfil thī magar kaafī thī mujhe duzdīda nazar

taskīn-e-dil-e-muztar ke liye itnā sā ishārā ho na sakā

ġhairoñ kī tarah muñh takte rahe har ek kā ham is mahfil meñ

āñkhoñ meñ chhalak aa.e aañsū phir zabt kā yaarā ho na sakā

aa.ī jo idhar mauj-e-tūfāñ kashtī thī shikasta Duub ga.ī

afsos payām-e-āfiyyat dariyā meñ kinārā ho na sakā

har bazm-e-nashāt ai 'aish' huī us shoḳh ke jalvoñ se raushan

kāshāna-e-ġham meñ jalva-fagan lekin vo dil-ārā ho na sakā

barbaad-e-mohabbat ho kar bhi jine ka sahaara ho na saka

ek dil pe bharosa tha apne wo bhi to hamara ho na saka

jalwon ki farawani tauba dam bhar mein huin KHira nazren

wo samne be-parda the magar hum se hi nazara ho na saka

aankhon ki zabani shikwa-e-gham karna tha bahut un se lekin

KHud husn pasheman ho jata ye hum se gawara ho na saka

mana ki bhari mahfil thi magar kafi thi mujhe duzdida nazar

taskin-e-dil-e-muztar ke liye itna sa ishaara ho na saka

ghairon ki tarah munh takte rahe har ek ka hum is mahfil mein

aankhon mein chhalak aae aansu phir zabt ka yara ho na saka

aai jo idhar mauj-e-tufan kashti thi shikasta Dub gai

afsos payam-e-afiyyat dariya mein kinara ho na saka

har bazm-e-nashat ai 'aish' hui us shoKH ke jalwon se raushan

kashana-e-gham mein jalwa-fagan lekin wo dil-ara ho na saka