barhaman mujhko banana na musalman karna

barhaman mujh ko banānā na musalmāñ karnā

mere saaqī mujhe mast-e-mai-e-irfāñ karnā

dāġh-e-dil siine meñ aahoñ se numāyāñ karnā

ham se sīkhe shab-e-ġham koī charāġhāñ karnā

haram o dair meñ jā jā ke charāġhāñ karnā

justujū terī hameñ tā-had-e-imkāñ karnā

dil ke bahlāne kā vahshat meñ ye sāmāñ karnā

chashm-e-ḳhūñ-bār se dāman ko gulistāñ karnā

havas-e-sair-e-gulistāñ ne qafas dikhlāyā

ab asīro na kabhī qasd-e-gulistāñ karnā

ahl-e-be-dād ke jab naam pukāre jaa.eñ

tum na ghabrā ke sar-e-hashr kahīñ haañ karnā

na kabhī maiñ ne kahā thā ki mujhe dard mile

na kahūñgā ki mire dard kā darmāñ karnā

un ke dīvānoñ ko sar phoḌ ke dīvāroñ se

aaj manzūr hai ārā.ish-e-zindāñ karnā

shaiḳh ko ka.aba mubārak ho barahman ko kunisht

ham ko sajda taraf-e-kūcha-e-jānāñ karnā

ai sabā tujh ko usī zulf-e-pareshāñ kī qasam

merā shīrāza-e-hastī bhī pareshāñ karnā

un ke dīvānoñ kī e.ajāz-nigāhī dekho

aañkh uThānā ki gulistāñ ko bayābāñ karnā

dāġh-e-dil parde meñ rah jaa.e na ai dast-e-junūñ

chaak kuchh aur abhī merā garebāñ karnā

lā ke phir misr meñ ai ishq kisī yūsuf ko

phir na.e rañg se ārā.ish-e-zindāñ karnā

dasht-e-ġhurbat meñ tire ḳhāk-nashīñ achchhe haiñ

chāhiye aur inheñ be-sar-o-sāmāñ karnā

zauq-e-sajda tujhe sañg-e-dar-e-jānāñ kī qasam

hosh kā mujh ko na sharminda-e-ehsāñ karnā

uTh rahe haiñ mire nazroñ se duī ke parde

kuchh madad aur ḳhayāl-e-ruḳh-e-jānāñ karnā

ban ga.e hairat-e-nazzāra kī sūrat 'bedam'

raas aayā na hameñ diid kā armāñ karnā

barhaman mujh ko banana na musalman karna

mere saqi mujhe mast-e-mai-e-irfan karna

dagh-e-dil sine mein aahon se numayan karna

hum se sikhe shab-e-gham koi charaghan karna

haram o dair mein ja ja ke charaghan karna

justuju teri hamein ta-had-e-imkan karna

dil ke bahlane ka wahshat mein ye saman karna

chashm-e-KHun-bar se daman ko gulistan karna

hawas-e-sair-e-gulistan ne qafas dikhlaya

ab asiro na kabhi qasd-e-gulistan karna

ahl-e-be-dad ke jab nam pukare jaen

tum na ghabra ke sar-e-hashr kahin han karna

na kabhi main ne kaha tha ki mujhe dard mile

na kahunga ki mere dard ka darman karna

un ke diwanon ko sar phoD ke diwaron se

aaj manzur hai aaraish-e-zindan karna

shaiKH ko kaba mubarak ho barahman ko kunisht

hum ko sajda taraf-e-kucha-e-jaanan karna

ai saba tujh ko usi zulf-e-pareshan ki qasam

mera shiraaza-e-hasti bhi pareshan karna

un ke diwanon ki eajaz-nigahi dekho

aankh uThana ki gulistan ko bayaban karna

dagh-e-dil parde mein rah jae na ai dast-e-junun

chaak kuchh aur abhi mera gareban karna

la ke phir misr mein ai ishq kisi yusuf ko

phir nae rang se aaraish-e-zindan karna

dasht-e-ghurbat mein tere KHak-nashin achchhe hain

chahiye aur inhen be-sar-o-saman karna

zauq-e-sajda tujhe sang-e-dar-e-jaanan ki qasam

hosh ka mujh ko na sharminda-e-ehsan karna

uTh rahe hain mere nazron se dui ke parde

kuchh madad aur KHayal-e-ruKH-e-jaanan karna

ban gae hairat-e-nazzara ki surat 'bedam'

ras aaya na hamein did ka arman karna