barkaten sab hain ayan daulat-e-ruhani ki

barkateñ sab haiñ ayaañ daulat-e-rūhānī kī

vaah kyā baat hai us chehra-e-nūrānī kī

shauq dekhe tujhe kis aañkh se ai mehr-e-jamāl

kuchh nihāyat hī nahīñ terī daraḳhshānī kī

mujh se vo sag bhī hai afzal jise izzat ho nasīb

āstān-e-haram-e-yār pe darbānī kī

jab sunā yaad kiyā karte ho tum bhī to mujhe

kyā kahūñ had na rahī kuchh mirī hairānī kī

sa.i-e-ahbāb ko nāhaq hai rihā.ī kā ḳhayāl

aur hī kuchh hai tamannā tire zindānī kī

vo tabassum bhī qayāmat hai tirā bād-e-jafā

tū ne dī ho jise ḳhidmat namak-afshānī kī

mushkiloñ se jo muqābil huī himmat merī

qadr baaqī na rahī aish-e-tan-āsānī kī

rah gayā jal ke tirī bazm meñ parvāna jo raat

khīñch ga.ī shakl mirī soḳhta-sāmānī kī

rashk-e-shāhī ho na kyuuñ apnī faqīrī 'hasrat'

kab se karte haiñ ġhulāmī shah-e-jīlānī kī

barkaten sab hain ayan daulat-e-ruhani ki

wah kya baat hai us chehra-e-nurani ki

shauq dekhe tujhe kis aankh se ai mehr-e-jamal

kuchh nihayat hi nahin teri daraKHshani ki

mujh se wo sag bhi hai afzal jise izzat ho nasib

aastan-e-haram-e-yar pe darbani ki

jab suna yaad kiya karte ho tum bhi to mujhe

kya kahun had na rahi kuchh meri hairani ki

sai-e-ahbab ko nahaq hai rihai ka KHayal

aur hi kuchh hai tamanna tere zindani ki

wo tabassum bhi qayamat hai tera baad-e-jafa

tu ne di ho jise KHidmat namak-afshani ki

mushkilon se jo muqabil hui himmat meri

qadr baqi na rahi aish-e-tan-asani ki

rah gaya jal ke teri bazm mein parwana jo raat

khinch gai shakl meri soKHta-samani ki

rashk-e-shahi ho na kyun apni faqiri 'hasrat'

kab se karte hain ghulami shah-e-jilani ki