barsa hai ashkon ka sawan bhi dil ki angnai mein

barsā hai ashkoñ kā sāvan bhī dil kī añgnā.ī meñ

phuul khile haiñ ġham ke kitne aaj mirī tanhā.ī meñ

shāḳh lachaknā ġhunche hañsnā panchhī gaanā bhuul ga.e

shāmil hai jo dard tumhārā yādoñ kī purvā.ī meñ

saudā ham ne apne junūñ kā nahīñ kiyā ai ahl-e-hosh

kī hai ḳhaak miTā kar hastī ḳhud ham ne rusvā.ī meñ

dekho saath na chhūTe apnā varna ham ko ḳhauf hai ye

ban jā.eñge naġhme mātam mausam kī shahnā.ī meñ

bāñhoñ meñ ākāsh bharā hai dhartī paañv se lipTī hai

qaid haiñ donoñ aalam us kī kaif bharī añgḌā.ī meñ

shoḳhī mastī ḳhushbū rañgat naaz tabassum aur lachak

ruup nazar aa.e haiñ kitne 'rāg' gul-e-sahrā.ī meñ

barsa hai ashkon ka sawan bhi dil ki angnai mein

phul khile hain gham ke kitne aaj meri tanhai mein

shaKH lachakna ghunche hansna panchhi gana bhul gae

shamil hai jo dard tumhaara yaadon ki purwai mein

sauda hum ne apne junun ka nahin kiya ai ahl-e-hosh

ki hai KHak miTa kar hasti KHud hum ne ruswai mein

dekho sath na chhuTe apna warna hum ko KHauf hai ye

ban jaenge naghme matam mausam ki shahnai mein

banhon mein aakash bhara hai dharti panw se lipTi hai

qaid hain donon aalam us ki kaif bhari angDai mein

shoKHi masti KHushbu rangat naz tabassum aur lachak

rup nazar aae hain kitne 'rag' gul-e-sahrai mein