barson gham-e-gesu mein giraftar to rakkha

barsoñ ġham-e-gesū meñ giraftār to rakkhā

ab kahte ho kyā tum ne mujhe maar to rakkhā

kuchh be-adabī aur shab-e-vasl nahīñ kī

haañ yaar ke ruḳhsār pe ruḳhsār to rakkhā

itnā bhī ġhanīmat hai tirī taraf se zālim

khiḌkī na rakhī rauzan-e-dīvār to rakkhā

vo zab.h kare yā na kare ġham nahīñ is kā

sar ham ne tah-e-ḳhanjar-e-ḳhūñ-ḳhvār to rakkhā

is ishq kī himmat ke maiñ sadqe huuñ ki 'begam'

har vaqt mujhe marne pe tayyār to rakkhā

barson gham-e-gesu mein giraftar to rakkha

ab kahte ho kya tum ne mujhe mar to rakkha

kuchh be-adabi aur shab-e-wasl nahin ki

han yar ke ruKHsar pe ruKHsar to rakkha

itna bhi ghanimat hai teri taraf se zalim

khiDki na rakhi rauzan-e-diwar to rakkha

wo zabh kare ya na kare gham nahin is ka

sar hum ne tah-e-KHanjar-e-KHun-KHwar to rakkha

is ishq ki himmat ke main sadqe hun ki 'begam'

har waqt mujhe marne pe tayyar to rakkha