barson purane zaKHm ko be-kar kar diya

barsoñ purāne zaḳhm ko be-kār kar diyā

ham ne tirā javāb bhī tayyār kar diyā

tauq-e-badan utaar ke pheñkā zamīñ se duur

duniyā ke saath chalne se inkār kar diyā

ḳhud hī dikhā.e ḳhvāb bhī tausī-e-shahr ke

jangal ko ḳhud hī chīḳh ke hushiyār kar diyā

jamhūriyat ke biich phañsī aqaliyat thā dil

mauqa jise jidhar se milā vaar kar diyā

aa.e the kuchh sitāre tirī raushnī ke saath

ham apne hī nashe meñ the inkār kar diyā

vo niiñd thī ki maut mujhe kuchh pata nahīñ

gahre ghane sukūt ne bedār kar diyā

ham aa.ine ke sāmne aa.e to ro paḌe

us ne sajā-sañvār ke be-kār kar diyā

barson purane zaKHm ko be-kar kar diya

hum ne tera jawab bhi tayyar kar diya

tauq-e-badan utar ke phenka zamin se dur

duniya ke sath chalne se inkar kar diya

KHud hi dikhae KHwab bhi tausi-e-shahr ke

jangal ko KHud hi chiKH ke hushiyar kar diya

jamhuriyat ke bich phansi aqaliyat tha dil

mauqa jise jidhar se mila war kar diya

aae the kuchh sitare teri raushni ke sath

hum apne hi nashe mein the inkar kar diya

wo nind thi ki maut mujhe kuchh pata nahin

gahre ghane sukut ne bedar kar diya

hum aaine ke samne aae to ro paDe

us ne saja-sanwar ke be-kar kar diya