bas ek raat mere ghar mein chand utra tha

bas ek raat mire ghar meñ chāñd utrā thā

phir is ke baad vahī maiñ vahī añdherā thā

sabā kā narm sā jhoñkā thā yā bagūlā thā

vo kyā thā jis ne mujhe muddatoñ rulāyā thā

ajab uThān liye thā vo ġhairat-e-shamshād

tabāh-hāl diloñ kā kahāñ Thikāna thā

añdherī shaam thī bādal baras na paa.e the

vo mere paas na thā aur maiñ khul ke royā thā

zamīñ meñ dafn mujhe kar gayā hai jīte-jī

to kyā maiñ us ke liye qīmtī ḳhazīna thā

jhulas jhulas ke maiñ anjām-kār Duub gayā

vo thā sarāb magar pāniyoñ sā gahrā thā

nishāñ kahīñ bhī na the us kī uñgliyoñ ke magar

maiñ ghar kī dekh ke ek ek chiiz royā thā

jale to saath jaleñgī ye jhāḌiyāñ 'iz.hār'

kisī ke shahr meñ to dard yuuñ na baTtā thā

bas ek raat mere ghar mein chand utra tha

phir is ke baad wahi main wahi andhera tha

saba ka narm sa jhonka tha ya bagula tha

wo kya tha jis ne mujhe muddaton rulaya tha

ajab uThan liye tha wo ghairat-e-shamshad

tabah-haal dilon ka kahan Thikana tha

andheri sham thi baadal baras na pae the

wo mere pas na tha aur main khul ke roya tha

zamin mein dafn mujhe kar gaya hai jite-ji

to kya main us ke liye qimti KHazina tha

jhulas jhulas ke main anjam-kar Dub gaya

wo tha sarab magar paniyon sa gahra tha

nishan kahin bhi na the us ki ungliyon ke magar

main ghar ki dekh ke ek ek chiz roya tha

jale to sath jalengi ye jhaDiyan 'izhaar'

kisi ke shahr mein to dard yun na baTta tha