bas ek nigah-e-karam hai kafi agar unhen pesh-o-pas nahin hai

bas ik nigāh-e-karam hai kaafī agar unheñ pesh-o-pas nahīñ hai

zahe tamannā ki merī fitrat asīr-e-hirs-o-havas nahīñ hai

nazar se sayyād duur ho jā yahāñ tirā mujh pe bas nahīñ hai

chaman ko barbād karne vaale ye āshiyāñ hai qafas nahīñ hai

kisī ke jalve taḌap rahe haiñ hudūd-e-hosh-o-ḳhirad se aage

hudūd-e-hosh-o-ḳhirad se aage nigāh kī dastaras nahīñ hai

jahāñ kī nairañgiyoñ se yaksar badal ga.ī āshiyāñ kī sūrat

qafas samajhtī haiñ jin ko nazreñ vo dar-haqīqat qafas nahīñ hai

kahāñ ke naale kahāñ kī aaheñ jamī haiñ un kī taraf nigāheñ

kuchh is qadar mahv-e-yād huuñ maiñ ki fursat-e-yak-nafas nahīñ hai

qusūr hai ishrat-e-guzishta kā husn-e-tāsīr allāh allāh

vahī fazā.eñ vahī havā.eñ chaman se kuchh kam qafas nahīñ hai

kisī kī be-e'tinā.iyoñ ne badal hī Daalā nizām-e-gulshan

jo baat pahle bahār meñ thī vo baat ab ke baras nahīñ hai

ye bū-e-sumbul ye ḳhanda-e-gul aur aah ye dukh bharī sadā.eñ

qafas ke andar chaman hai shāyad chaman ke andar qafas nahīñ hai

na hosh-e-ḳhalvat na fikr-e-mahfil ayaañ ho ab kis pe hālat-e-dil

maiñ aap hī apnā ham-nafas huuñ mirā koī ham-nafas nahīñ hai

kareñ bhī kyā shikva-e-zamāna kaheñ bhī kyā dard kā fasāna

jahāñ meñ haiñ laakh dushman-e-jāñ koī masīhā-nafas nahīñ hai

sunī haiñ ahl-e-junūñ ne aksar ḳhamoshi-e-marg kī sadā.eñ

sunā ye thā kārvān-e-hastī rahīn-e-bāñg-e-jaras nahīñ hai

chaman kī āzādiyāñ mo.aḳhḳhar tasavvur-e-āshiyāñ muqaddam

ġham-e-asīrī hai nā-mukammal agar ġham-e-ḳhār-o-ḳhas nahīñ hai

na kar mujhe sharmsār nāseh maiñ dil se majbūr huuñ ki jis kā

hai yuuñ to kaun-o-makāñ pe qaabū magar mohabbat pe bas nahīñ hai

kahāñ vo ummīd-e-āmad-āmad kahāñ ye īfā-e-ahd-e-fardā

jab e'tibār-e-nazar na thā kuchh ab e'tibār-e-nafas nahīñ hai

vahī haiñ naġhme vahī haiñ naale sun ai mujhe bhuul jaane vaale

tirī samā.at se duur haiñ ye jabhī to nāloñ meñ ras nahīñ hai

'shakīl' duniyā meñ jis ko dekhā kuchh us kī duniyā hī aur dekhī

hazār naqqād-e-zindagī haiñ magar koī nukta-ras nahīñ hai

bas ek nigah-e-karam hai kafi agar unhen pesh-o-pas nahin hai

zahe tamanna ki meri fitrat asir-e-hirs-o-hawas nahin hai

nazar se sayyaad dur ho ja yahan tera mujh pe bas nahin hai

chaman ko barbaad karne wale ye aashiyan hai qafas nahin hai

kisi ke jalwe taDap rahe hain hudud-e-hosh-o-KHirad se aage

hudud-e-hosh-o-KHirad se aage nigah ki dastaras nahin hai

jahan ki nairangiyon se yaksar badal gai aashiyan ki surat

qafas samajhti hain jin ko nazren wo dar-haqiqat qafas nahin hai

kahan ke nale kahan ki aahen jami hain un ki taraf nigahen

kuchh is qadar mahw-e-yaad hun main ki fursat-e-yak-nafas nahin hai

qusur hai ishrat-e-guzishta ka husn-e-tasir allah allah

wahi fazaen wahi hawaen chaman se kuchh kam qafas nahin hai

kisi ki be-e'tinaiyon ne badal hi Dala nizam-e-gulshan

jo baat pahle bahaar mein thi wo baat ab ke baras nahin hai

ye bu-e-sumbul ye KHanda-e-gul aur aah ye dukh bhari sadaen

qafas ke andar chaman hai shayad chaman ke andar qafas nahin hai

na hosh-e-KHalwat na fikr-e-mahfil ayan ho ab kis pe haalat-e-dil

main aap hi apna ham-nafas hun mera koi ham-nafas nahin hai

karen bhi kya shikwa-e-zamana kahen bhi kya dard ka fasana

jahan mein hain lakh dushman-e-jaan koi masiha-nafas nahin hai

suni hain ahl-e-junun ne aksar KHamoshi-e-marg ki sadaen

suna ye tha karwan-e-hasti rahin-e-bang-e-jaras nahin hai

chaman ki aazadiyan moaKHKHar tasawwur-e-ashiyan muqaddam

gham-e-asiri hai na-mukammal agar gham-e-KHar-o-KHas nahin hai

na kar mujhe sharmsar naseh main dil se majbur hun ki jis ka

hai yun to kaun-o-makan pe qabu magar mohabbat pe bas nahin hai

kahan wo ummid-e-amad-amad kahan ye ifa-e-ahd-e-farda

jab e'tibar-e-nazar na tha kuchh ab e'tibar-e-nafas nahin hai

wahi hain naghme wahi hain nale sun ai mujhe bhul jaane wale

teri samaat se dur hain ye jabhi to nalon mein ras nahin hai

'shakil' duniya mein jis ko dekha kuchh us ki duniya hi aur dekhi

hazar naqqad-e-zindagi hain magar koi nukta-ras nahin hai