bas ki chun badr-zamana ye ghaTata hai mujhe

bas ki chuuñ badr-zamāna ye ghaTātā hai mujhe

din-ba-din aur hī aalam nazar aatā hai mujhe

husn nairañgī-e-ālam kā ajab rañg se kuchh

ain nairañgī meñ sau rañg dikhātā hai mujhe

itnā ma.alūm to hotā hai ki jaatā huuñ kahīñ

koī hai mujh meñ ki mujh se liye jaatā hai mujhe

yaad maiñ kis kī karūñ mujh ko kahāñ hosh-o-havās

apnī hī yaad se ye ishq bhulātā hai mujhe

turfa aalam hai ki har ek se vo māya-nāz

aap rahtā hai alag aur bhiḌātā hai mujhe

chhoḌ kar mujh ko vo tanhā koī jaatā hai kahīñ

ye bhī ik chheḌ hai us ko ki kuḌhātā hai mujhe

mujh ko kyuuñ khīñche liye jaa.e hai taqsīr mirī

umr Tuk rah to sahī kaun bulātā hai mujhe

mujh meñ aur dil meñ sadā hai sabaq-e-ishq kā dars

maiñ sunātā huuñ use aur vo sunātā hai mujhe

mere nāḳhūnoñ meñ maiñ tujh se kiye chaar abrū

apnī kyā teġh se har dam tū Darātā hai mujhe

tā.ir-e-rañg-e-hinā huuñ to lagūñ tere haath

chuTkiyoñ meñ tū abas yaar uḌātā hai mujhe

tujh ko manzūr jafā mujh ko hai matlūb vafā

na ye bhātā hai tujhe aur na vo bhātā hai mujhe

jo mirī chiḌh hai usī baat kā hai tujh ko zauq

aah tū dīda-o-dānista khujātā hai mujhe

phir phir ā.īne meñ muñh dekhne lagtā hai 'hasan'

ek dam aap meñ vo shoḳh jo paatā hai mujhe

bas ki chun badr-zamana ye ghaTata hai mujhe

din-ba-din aur hi aalam nazar aata hai mujhe

husn nairangi-e-alam ka ajab rang se kuchh

ain nairangi mein sau rang dikhata hai mujhe

itna malum to hota hai ki jata hun kahin

koi hai mujh mein ki mujh se liye jata hai mujhe

yaad main kis ki karun mujh ko kahan hosh-o-hawas

apni hi yaad se ye ishq bhulata hai mujhe

turfa aalam hai ki har ek se wo maya-naz

aap rahta hai alag aur bhiData hai mujhe

chhoD kar mujh ko wo tanha koi jata hai kahin

ye bhi ek chheD hai us ko ki kuDhata hai mujhe

mujh ko kyun khinche liye jae hai taqsir meri

umr Tuk rah to sahi kaun bulata hai mujhe

mujh mein aur dil mein sada hai sabaq-e-ishq ka dars

main sunata hun use aur wo sunata hai mujhe

mere naKHunon mein main tujh se kiye chaar abru

apni kya tegh se har dam tu Daraata hai mujhe

tair-e-rang-e-hina hun to lagun tere hath

chuTkiyon mein tu abas yar uData hai mujhe

tujh ko manzur jafa mujh ko hai matlub wafa

na ye bhata hai tujhe aur na wo bhata hai mujhe

jo meri chiDh hai usi baat ka hai tujh ko zauq

aah tu dida-o-danista khujata hai mujhe

phir phir aaine mein munh dekhne lagta hai 'hasan'

ek dam aap mein wo shoKH jo pata hai mujhe