bas-ki didar tera jalwa-e-quddusi hai

bas-ki dīdār tirā jalva-e-quddūsī hai

dāman-e-vasl bhī ālūda-e-māyūsī hai

hai kahāñ bū-e-vafā us dahan-e-shīrīñ meñ

ġhuncha-lab terī zabāñ ham ne bahut chūsī hai

yaar go ḳhuun mirā misl-e-hinā ho pāmāl

lekin apne ta.iiñ manzūr qadam-bosī hai

dil mirā ḳhaak shagufta ho chaman meñ jā kar

gul meñ ye rang kahāñ ek tirī bū sī hai

ek din zulf ke muñh par na chaḌhī ye kāfir

yād-e-kākul ko faqat sheva-e-jāsūsī hai

vo sajī teġh ki dam meñ kare lākhoñ ko qatl

kaun kahtā hai miyāñ terī kamar mū sī hai

shaiḳh rotā hai ise sun ke brahman yaksū

pur-asar bas ki mirā nālā-e-nāqūsī hai

chashm-e-namnāk ne az bas-ki bujhāyā us ko

ātish-e-'ishq kahāñ dil meñ magar lū sī hai

ai 'fuġhāñ' ishq kahāñ dil meñ ba-qaul-e-'minnat'

haañ ye sach milne kī ḳhūbāñ se to ik ḳhū sī hai

bas-ki didar tera jalwa-e-quddusi hai

daman-e-wasl bhi aaluda-e-mayusi hai

hai kahan bu-e-wafa us dahan-e-shirin mein

ghuncha-lab teri zaban hum ne bahut chusi hai

yar go KHun mera misl-e-hina ho pamal

lekin apne tain manzur qadam-bosi hai

dil mera KHak shagufta ho chaman mein ja kar

gul mein ye rang kahan ek teri bu si hai

ek din zulf ke munh par na chaDhi ye kafir

yaad-e-kakul ko faqat shewa-e-jasusi hai

wo saji tegh ki dam mein kare lakhon ko qatl

kaun kahta hai miyan teri kamar mu si hai

shaiKH rota hai ise sun ke brahman yaksu

pur-asar bas ki mera nala-e-naqusi hai

chashm-e-namnak ne az bas-ki bujhaya us ko

aatish-e-'ishq kahan dil mein magar lu si hai

ai 'fughan' ishq kahan dil mein ba-qaul-e-'minnat'

han ye sach milne ki KHuban se to ek KHu si hai