bas ki pabandi-e-ain-e-wafa humse hui

bas ki pābandi-e-ā.īn-e-vafā ham se huī

ye agar koī ḳhatā hai to ḳhatā ham se huī

zindagī tere liye sab ko ḳhafā ham ne kiyā

apnī qismat hai ki ab tū bhī ḳhafā ham se huī

raat bhar chain se sone nahīñ detī ham ko

itnī māyūs tirī zulf-e-rasā ham se huī

sar uThāne kā bhalā aur kise yaarā thā

bas tire shahr meñ ye rasm adā ham se huī

bār-hā dast-e-sitam-gar ko qalam ham ne kiyā

bār-hā chaak añdhere kī qabā ham se huī

ham ne utne hī sar-e-rāh jalā.e haiñ charāg

jitnī bargashta zamāne kī havā ham se huī

bār-e-hastī to uThā uTh na sakā dast-e-savāl

marte marte na kabhī koī duā ham se huī

kuchh dinoñ saath lagī thī hameñ tanhā pā kar

kitnī sharminda magar mauj-e-balā ham se huī

bas ki pabandi-e-ain-e-wafa hum se hui

ye agar koi KHata hai to KHata hum se hui

zindagi tere liye sab ko KHafa hum ne kiya

apni qismat hai ki ab tu bhi KHafa hum se hui

raat bhar chain se sone nahin deti hum ko

itni mayus teri zulf-e-rasa hum se hui

sar uThane ka bhala aur kise yara tha

bas tere shahr mein ye rasm ada hum se hui

bar-ha dast-e-sitam-gar ko qalam hum ne kiya

bar-ha chaak andhere ki qaba hum se hui

hum ne utne hi sar-e-rah jalae hain charag

jitni bargashta zamane ki hawa hum se hui

bar-e-hasti to uTha uTh na saka dast-e-sawal

marte marte na kabhi koi dua hum se hui

kuchh dinon sath lagi thi hamein tanha pa kar

kitni sharminda magar mauj-e-bala hum se hui