bas yahi to muddaa hai aap ke irshad ka

bas yahī to mudda.ā hai aap ke irshād kā

'shād' kis ne naam rakkhā āshiq-e-nāshād kā

lījiye hāzir hai nazrāna dil-e-nāshād kā

Tālnā āsāñ na thā kuchh aap ke irshād kā

barq samjhā hai jise saarā zamāna dekhiye

āsmāñ par chaḌh gayā lachhā mirī fariyād kā

hashr se ishq-e-nihāñ kī aur shohrat ho ga.ī

ek aalam qissa-ḳhvāñ niklā mirī rūdād kā

be-ta.alluq ho ke rahnā bāġh-e-ālam meñ muhāl

pā-ba-gul honā to dekho sarv se āzād kā

bāġhbāñ sayyād gulchīñ sab ke sab dekhā kiye

āshiyāñ ujḌā kiyā ik ḳhānamāñ-barbād kā

tark-e-ulfat par jo maiñ zinda rahā ghabrā ga.e

DhūñDte haiñ ab nayā pahlū koī bedād kā

zikr-e-dushman par mujhe jhuTlāne vaale phir tū kah

tum ho muztar kyā bharosa hai tumhārī yaad kā

garmī-e-dāġh-e-jigar se mom ho kar bah gayā

tum usī ḳhanjar ko samjhe the ki hai faulād kā

aañkh se kuchh ho ishāra kuchh tabassum lab pe ho

'shād' karnā kuchh nahīñ mushkil dil-e-nāshād kā

terī sab sunte haiñ merī koī suntā hī nahīñ

kis se ro.uuñ jā ke ab dukhḌā tirī bedād kā

'shād' yaktā-e-jahāñ hai aap ke sar kī qasam

dekh lenā jā-nashīñ hogā yahī ustād kā

bas yahi to muddaa hai aap ke irshad ka

'shad' kis ne nam rakkha aashiq-e-nashad ka

lijiye hazir hai nazrana dil-e-nashad ka

Talna aasan na tha kuchh aap ke irshad ka

barq samjha hai jise sara zamana dekhiye

aasman par chaDh gaya lachha meri fariyaad ka

hashr se ishq-e-nihan ki aur shohrat ho gai

ek aalam qissa-KHwan nikla meri rudad ka

be-talluq ho ke rahna bagh-e-alam mein muhaal

pa-ba-gul hona to dekho sarw se aazad ka

baghban sayyaad gulchin sab ke sab dekha kiye

aashiyan ujDa kiya ek KHanaman-barbaad ka

tark-e-ulfat par jo main zinda raha ghabra gae

DhunDte hain ab naya pahlu koi bedad ka

zikr-e-dushman par mujhe jhuTlane wale phir tu kah

tum ho muztar kya bharosa hai tumhaari yaad ka

garmi-e-dagh-e-jigar se mom ho kar bah gaya

tum usi KHanjar ko samjhe the ki hai faulad ka

aankh se kuchh ho ishaara kuchh tabassum lab pe ho

'shad' karna kuchh nahin mushkil dil-e-nashad ka

teri sab sunte hain meri koi sunta hi nahin

kis se roun ja ke ab dukhDa teri bedad ka

'shad' yakta-e-jahan hai aap ke sar ki qasam

dekh lena ja-nashin hoga yahi ustad ka