basai maine jo qalb-e-hazin mein

basā.ī maiñ ne jo qalb-e-hazīñ meñ

vo duniyā kaam aa.ī kār-e-dīñ meñ

vahī hai asal meñ jān-e-tamannā

jo hasrat hai nigāh-e-vāpsīñ meñ

tire shauq-e-sarāpā kī kashish hai

simaT aayā huuñ maiñ apnī jabīñ meñ

hai pech-o-tāb meñ har mauj-e-sāhil

vo betābī hai mauj-e-tah-nashīñ meñ

haqīqat hai ki ho tum jān-e-ḳhūbī

ki ḳhūbī hai vatan kī sar-zamīñ meñ

mohabbat hai ki vo aks-e-masarrat

utar aayā mire qalb-e-hazīñ meñ

junūñ ke raaj meñ insāf hogā

na hogā farq jeb o āstīñ meñ

bahut kuchh pāoge duniyā meñ pyāre

mohabbat pāoge lekin hamīñ meñ

'buḳhārī' kī taḌap 'hāfiz' kī mastī

tumhāre naġhma-e-vajd-āfrīñ meñ

basai main ne jo qalb-e-hazin mein

wo duniya kaam aai kar-e-din mein

wahi hai asal mein jaan-e-tamanna

jo hasrat hai nigah-e-wapsin mein

tere shauq-e-sarapa ki kashish hai

simaT aaya hun main apni jabin mein

hai pech-o-tab mein har mauj-e-sahil

wo betabi hai mauj-e-tah-nashin mein

haqiqat hai ki ho tum jaan-e-KHubi

ki KHubi hai watan ki sar-zamin mein

mohabbat hai ki wo aks-e-masarrat

utar aaya mere qalb-e-hazin mein

junun ke raj mein insaf hoga

na hoga farq jeb o aastin mein

bahut kuchh paoge duniya mein pyare

mohabbat paoge lekin hamin mein

'buKHari' ki taDap 'hafiz' ki masti

tumhaare naghma-e-wajd-afrin mein