bashaarat ho ki ab mujh sa koi pagal na aaega

bashārat ho ki ab mujh sā koī pāgal na aa.egā

ye daur-e-āḳhir-e-dīvāngī hai biit jā.egā

kisī kī zindagī zaa.e.a na hogī ab mohabbat meñ

koī dhokā na degā ab koī dhokā na khā.egā

na ab utregā qudsī koī insānoñ kī bastī par

na ab jañgal meñ charvāhā koī bheḌeñ charā.egā

giroh-e-ibn-e-ādam laakh bhaTke laakh sar paTke

ab is andar se koī rāsta bāhar na jā.egā

bashar ko dekh kar be-intihā afsos aatā hai

na ma.alūm is ḳharābātī ko kis din hosh aa.egā

miTā bhī de mujhe ab ai musavvir! tā-ba-kai āḳhir

bānegā bigāḌegā bigāḌegā bānegā

mohabbat bhī kahīñ ai dost! tardīdoñ se chhuptī hai

kise qaa.el karegā tū kise bāvar karā.egā

ġhanīmat jaan agar do bol bhī kānoñ meñ paḌ jaa.eñ

ki phir ye bolne vaalā na ro.egā na gā.egā

'shu.ūr' āḳhir use ham se ziyāda jānte ho tum?

bahut sīdhā sahī lekin tumheñ to bech khā.egā

bashaarat ho ki ab mujh sa koi pagal na aaega

ye daur-e-aKHir-e-diwangi hai bit jaega

kisi ki zindagi zaea na hogi ab mohabbat mein

koi dhoka na dega ab koi dhoka na khaega

na ab utrega qudsi koi insanon ki basti par

na ab jangal mein charwaha koi bheDen charaega

giroh-e-ibn-e-adam lakh bhaTke lakh sar paTke

ab is andar se koi rasta bahar na jaega

bashar ko dekh kar be-intiha afsos aata hai

na malum is KHarabaati ko kis din hosh aaega

miTa bhi de mujhe ab ai musawwir! ta-ba-kai aaKHir

banega bigaDega bigaDega banega

mohabbat bhi kahin ai dost! tardidon se chhupti hai

kise qael karega tu kise bawar karaega

ghanimat jaan agar do bol bhi kanon mein paD jaen

ki phir ye bolne wala na roega na gaega

'shuur' aaKHir use hum se ziyaada jaante ho tum?

bahut sidha sahi lekin tumhein to bech khaega