bashar roz-e-azal se shefta hai shan-o-shaukat ka

bashar roz-e-azal se shefta hai shān-o-shaukat kā

anāsir ke muraqqe meñ bharā hai naqsh daulat kā

azal ke din se ġham mushtāq thā jo merī ḳhilqat kā

banāyā āñsuoñ se gūñdh kar putlā kudūrat kā

muqaddar ne diyā hai haath meñ kaasa halākat kā

gadā huuñ us parī-paikar kā jo TukḌā hai aafat kā

rahe sīna-sipar har-dam ye jauhar hai mohabbat kā

kabhī lohā na maanā yaar kī teġh-e-adāvat

dikhāyā us ne ban-Than kar vo jalva apnī sūrat kā

ki paanī phir gayā ā.īne par dariyā-e-hairat kā

ḳhudā ābād rakkhe lucknow ke ḳhush-mizājoñ ko

har ik ghar ḳhāna-e-shādī hai har kūcha hai ishrat kā

shab-e-vaslat to jaate jaate andhā kar ga.ī mujh ko

tum ab bahrā karo sāhab sunā kar naam ruḳhsat kā

mare jis par na chaar aañsū bahā.e us ne murde par

huā sābit ki paanī bah gayā chashm-e-muravvat kā

jalā.e dost yā ThanDā kare dil jo razā us kī

na dozaḳh se mujhe nafrat na maiñ mushtāq jannat kā

na hogā farq nuqte kā milā kar dekh le koī

mire āmāl-nāme se navishta merī qismat kā

jo shāmil hai karam us kā to kyā ġham kisht-e-uqbā kā

siyah-nāmī se apne kaam lūñgā abr-e-rahmat kā

ḳhudā ne dī hai lazzat ġham-ḳhurī kī ḳhush-mazāqoñ ko

lahū kī ghūñT piine meñ mazā miltā hai sharbat kā

har ik tasvīr hai sānī-e-yūsuf apne aalam meñ

zarā yāqūb dekhe to muraqqa.a us kī qudrat kā

yad-e-baizā ke daste aage aage le chale muusā

shab-e-me.arāj ko raushan huā haal us kī azmat kā

ziyāda chāñd sūraj se tirā nuur āshkārā hai

na dekheñ terā jalva ham qusūr apnī basārat kā

vo aalam hai na ġham se ġham na shādī se mujhe shādī

barābar mere mīzāñ meñ hai palla rañj-o-rāhat kā

tumhārī fitna-e-qāmat ne aisā ro.ab bāñdhā hai

qadam-bhar bhī qadam aa ke nahīñ baḌhtā qayāmat kā

shahīdān-e-ḳhudā mujh ko bhī thoḌī se jagah denā

na ho barbād merī ḳhaak sadqa apnī turbat kā

shab-e-vasl-e-sanam kā ḳhātma bil-ḳhair ho yārab

na āñkhoñ par kahīñ phir jaa.e chūnā sub.h-e-furqat kā

halāvat zindagī kī hai mulāqāt-e-ahibbā meñ

mazā murde ko tanhā.ī kā hai zinde ko sohbat kā

mazā ishq-e-haqīqī meñ na kuchh ishq-e-majāzī meñ

ḳhudā se ġham duī kā hai sanam se rañj furqat kā

chhurī nā-qadrdānoñ kī ravāñ hai ahl-e-jauhar par

kafan ko yaad karnā 'bahr' dhyān aa.e jo ḳhilqat kā

bashar roz-e-azal se shefta hai shan-o-shaukat ka

anasir ke muraqqe mein bhara hai naqsh daulat ka

azal ke din se gham mushtaq tha jo meri KHilqat ka

banaya aansuon se gundh kar putla kudurat ka

muqaddar ne diya hai hath mein kasa halakat ka

gada hun us pari-paikar ka jo TukDa hai aafat ka

rahe sina-sipar har-dam ye jauhar hai mohabbat ka

kabhi loha na mana yar ki tegh-e-adawat

dikhaya us ne ban-Than kar wo jalwa apni surat ka

ki pani phir gaya aaine par dariya-e-hairat ka

KHuda aabaad rakkhe lucknow ke KHush-mizajon ko

har ek ghar KHana-e-shadi hai har kucha hai ishrat ka

shab-e-waslat to jate jate andha kar gai mujh ko

tum ab bahra karo sahab suna kar nam ruKHsat ka

mare jis par na chaar aansu bahae us ne murde par

hua sabit ki pani bah gaya chashm-e-murawwat ka

jalae dost ya ThanDa kare dil jo raza us ki

na dozaKH se mujhe nafrat na main mushtaq jannat ka

na hoga farq nuqte ka mila kar dekh le koi

mere aamal-name se nawishta meri qismat ka

jo shamil hai karam us ka to kya gham kisht-e-uqba ka

siyah-nami se apne kaam lunga abr-e-rahmat ka

KHuda ne di hai lazzat gham-KHuri ki KHush-mazaqon ko

lahu ki ghunT pine mein maza milta hai sharbat ka

har ek taswir hai sani-e-yusuf apne aalam mein

zara yaqub dekhe to muraqqa us ki qudrat ka

yad-e-baiza ke daste aage aage le chale musa

shab-e-mearaj ko raushan hua haal us ki azmat ka

ziyaada chand suraj se tera nur aashkara hai

na dekhen tera jalwa hum qusur apni basarat ka

wo aalam hai na gham se gham na shadi se mujhe shadi

barabar mere mizan mein hai palla ranj-o-rahat ka

tumhaari fitna-e-qamat ne aisa roab bandha hai

qadam-bhar bhi qadam aa ke nahin baDhta qayamat ka

shahidan-e-KHuda mujh ko bhi thoDi se jagah dena

na ho barbaad meri KHak sadqa apni turbat ka

shab-e-wasl-e-sanam ka KHatma bil-KHair ho yarab

na aankhon par kahin phir jae chuna subh-e-furqat ka

halawat zindagi ki hai mulaqat-e-ahibba mein

maza murde ko tanhai ka hai zinde ko sohbat ka

maza ishq-e-haqiqi mein na kuchh ishq-e-majazi mein

KHuda se gham dui ka hai sanam se ranj furqat ka

chhuri na-qadrdanon ki rawan hai ahl-e-jauhar par

kafan ko yaad karna 'bahr' dhyan aae jo KHilqat ka