basiraton ka nazar ehtiram karti hai

basīratoñ kā nazar ehtirām kartī hai

samā.atoñ se ḳhamoshī kalām kartī hai

ḳhizāñ kā raaz jo āñkhoñ pe munkashif ho jaa.e

to zard rut bhī bahāroñ kā kaam kartī hai

kahāñ kā zarf kahāñ kā vaqār ye duniyā

nigāh jeb pe rakh kar salām kartī hai

zarūrateñ dar-e-shāhī pe le ke jaatī haiñ

mirī anā mujhe apnā ġhulām kartī hai

hisār-e-sūd-o-ziyāñ se nikāl de yā-rab

ye zindagī mirā jiinā harām kartī hai

buland-o-past se parvāz māvarā hai mirī

ye kā.enāt mujhe zer-e-dām kartī hai

ḳhudā kā shukr ki maiñ ḳhud se āshnā huuñ 'nadīm'

mirī nigāh mirā ehtirām kartī hai

basiraton ka nazar ehtiram karti hai

samaaton se KHamoshi kalam karti hai

KHizan ka raaz jo aankhon pe munkashif ho jae

to zard rut bhi bahaaron ka kaam karti hai

kahan ka zarf kahan ka waqar ye duniya

nigah jeb pe rakh kar salam karti hai

zaruraten dar-e-shahi pe le ke jati hain

meri ana mujhe apna ghulam karti hai

hisar-e-sud-o-ziyan se nikal de ya-rab

ye zindagi mera jina haram karti hai

buland-o-past se parwaz mawara hai meri

ye kaenat mujhe zer-e-dam karti hai

KHuda ka shukr ki main KHud se aashna hun 'nadim'

meri nigah mera ehtiram karti hai