bataen kya amal ishq-e-haqiqi ka kahan tak hai

batā.eñ kyā amal ishq-e-haqīqī kā kahāñ tak hai

zamīñ kyā āsmāñ tak hai makāñ kyā lā-makāñ tak hai

ta.ayyun se barī ho gar hai lā-mahdūd kā tālib

ki hadd-e-mulk-o-duniyā to vahīñ tak hai jahāñ tak hai

na ho āzād daur-e-charḳh kī halqa-ba-goshī se

tirā markūz dil-e-māo-shumā aur īn-o-āñ tak hai

to bismillāh ke gumbad meñ kyā hai mo.atakif zāhid

sukūn-e-ḳhātir-e-muztar havāsoñ se amaañ tak hai

pahuñch saktā hai kab sachchī ḳhushī ko aish-e-nafsānī

ki vo to āb-e-ruknābād va jū-e-mūliyāñ tak hai

hai shaiḳh-o-barahman ke diin kī had dair-o-ka.aba tak

savād-e-dīn-e-ishq-e-be-ġharaz kaun-o-makāñ tak hai

yaqīñ se aur amal se puḳhtagī paa.ī aqīdat ne

pahuñch terī to ai nādān bas vahm-o-gumāñ tak hai

haqīqat husn kī ā.īna tujh par kyūñki ho jaatī

nazar terī to zulf-o-ḳhāl-o-abrū-e-butāñ tak hai

jo haiñ mast-e-alast un ko ḳhumār-o-sukr kā Dar kyā

nigāh-e-tishna-kām-e-ishq hī dast-e-muġhāñ tak hai

hasīr-e-ishq ko kab daḳhl is mahfil meñ hai 'kaifī'

bisāt us kī faqat bain-o-bukā āh-o-fuġhāñ tak hai

bataen kya amal ishq-e-haqiqi ka kahan tak hai

zamin kya aasman tak hai makan kya la-makan tak hai

tayyun se bari ho gar hai la-mahdud ka talib

ki hadd-e-mulk-o-duniya to wahin tak hai jahan tak hai

na ho aazad daur-e-charKH ki halqa-ba-goshi se

tera markuz dil-e-mao-shuma aur in-o-an tak hai

to bismillah ke gumbad mein kya hai moatakif zahid

sukun-e-KHatir-e-muztar hawason se aman tak hai

pahunch sakta hai kab sachchi KHushi ko aish-e-nafsani

ki wo to aab-e-ruknabaad wa ju-e-muliyan tak hai

hai shaiKH-o-barahman ke din ki had dair-o-kaba tak

sawad-e-din-e-ishq-e-be-gharaz kaun-o-makan tak hai

yaqin se aur amal se puKHtagi pai aqidat ne

pahunch teri to ai nadan bas wahm-o-guman tak hai

haqiqat husn ki aaina tujh par kyunki ho jati

nazar teri to zulf-o-KHal-o-abru-e-butan tak hai

jo hain mast-e-alast un ko KHumar-o-sukr ka Dar kya

nigah-e-tishna-kaam-e-ishq hi dast-e-mughan tak hai

hasir-e-ishq ko kab daKHl is mahfil mein hai 'kaifi'

bisat us ki faqat bain-o-buka aah-o-fughan tak hai