bataen kya ki kitna jaante hain

batā.eñ kyā ki kitnā jānte haiñ

tumheñ tum se ziyāda jānte haiñ

ḳhamoshī se ayaañ hotā hai un kī

vo apnī baat kahnā jānte haiñ

bahut paḌh kar huā ye ilm ham ko

ki ham kitnā zarā sā jante haiñ

qalam kāġhaz hamāre sher aur tum

use ham apnī duniyā jānte haiñ

ham aa jaate haiñ aksar apne aage

magar ham bach nikalnā jānte haiñ

pata hai rūThne vaale ko 'āsif'

ki ham rishte nibhānā jānte haiñ

bataen kya ki kitna jaante hain

tumhein tum se ziyaada jaante hain

KHamoshi se ayan hota hai un ki

wo apni baat kahna jaante hain

bahut paDh kar hua ye ilm hum ko

ki hum kitna zara sa jante hain

qalam kaghaz hamare sher aur tum

use hum apni duniya jaante hain

hum aa jate hain aksar apne aage

magar hum bach nikalna jaante hain

pata hai ruThne wale ko 'asif'

ki hum rishte nibhana jaante hain