bataen kya tujhko chashm-e-pur-nam hua hai kya KHun aarzu ka

batā.eñ kyā tujh ko chashm-e-pur-nam huā hai kyā ḳhuuñ aarzū kā

banā gul-e-dāġh-e-yās-o-hasrat jo dil meñ qatra bachā lahū kā

dabe jo ghuT ghuT ke dil meñ armāñ vo barq ban kar falak pe taḌpe

jo valvala jī meñ rah gayā thā vo bulbula ab hai āb-e-jū kā

abas hai to chāra-gar-e-pareshāñ na tujh se kuchh ban paḌegā darmāñ

ki ho to tār-e-nafas se sāmāñ jarāhat-e-dil ke ho rafū kā

khulā lab-e-gor se ye uqda ki ḳhvāb thī sab numūd-e-hastī

vuqūf nā-mahrūmī-e-manzil kamāl hai merī justujū kā

na tujh ko mast-e-havā-e-gulshan ḳhizāñ meñ ai andalīb dekhā

nahīñ tū shaidā.ī bāġh-o-gul kā magar fidā.ī hai rañg-o-bū kā

use na phir kuchh diyā dikhā.ī nazar paḌā vo jamāl jis ko

khulā haqīqat kā raaz jis par na us ko yaarā thā guftugū kā

hai naf-e-zāt aur nasḳh-e-hastī visāl-e-jānāñ kī shart-e-avval

bharā manāzir se hai jahāñ sab jo sirf darshan kā tū hai bhūkā

tilism-e-dair-o-haram hai tujh par hanūz dillī hai duur nādāñ

vahāñ tirā ḳhaak dil lagegā vo hai sarāsar makān hū kā

ḳhabar kise sub.h-o-shām kī hai ta.a.īnāt aur quyūd kaise

namāz kis kī vahāñ kisī ko ḳhayāl tak bhī nahīñ vuzū kā

nahīñ muhīt-e-rusūm-o-millat hai be-nishāñ manzil-e-haqīqat

vahāñ na simran kī hatkaḌī hai na tauq-e-zunnār hai gulū kā

haiñ ġharq-e-bahr-e-mai-e-mohabbat vahāñ hai 'kaifī' ye sab kī hālat

hai daḳhl saaqī kī bazm meñ kyā surāhī-o-sāġhar-o-subū kā

bataen kya tujh ko chashm-e-pur-nam hua hai kya KHun aarzu ka

bana gul-e-dagh-e-yas-o-hasrat jo dil mein qatra bacha lahu ka

dabe jo ghuT ghuT ke dil mein arman wo barq ban kar falak pe taDpe

jo walwala ji mein rah gaya tha wo bulbula ab hai aab-e-ju ka

abas hai to chaara-gar-e-pareshan na tujh se kuchh ban paDega darman

ki ho to tar-e-nafas se saman jarahat-e-dil ke ho rafu ka

khula lab-e-gor se ye uqda ki KHwab thi sab numud-e-hasti

wuquf na-mahrumi-e-manzil kamal hai meri justuju ka

na tujh ko mast-e-hawa-e-gulshan KHizan mein ai andalib dekha

nahin tu shaidai bagh-o-gul ka magar fidai hai rang-o-bu ka

use na phir kuchh diya dikhai nazar paDa wo jamal jis ko

khula haqiqat ka raaz jis par na us ko yara tha guftugu ka

hai naf-e-zat aur nasKH-e-hasti visal-e-jaanan ki shart-e-awwal

bhara manazir se hai jahan sab jo sirf darshan ka tu hai bhuka

tilism-e-dair-o-haram hai tujh par hanuz dilli hai dur nadan

wahan tera KHak dil lagega wo hai sarasar makan hu ka

KHabar kise subh-o-sham ki hai tainat aur quyud kaise

namaz kis ki wahan kisi ko KHayal tak bhi nahin wuzu ka

nahin muhit-e-rusum-o-millat hai be-nishan manzil-e-haqiqat

wahan na simran ki hatkaDi hai na tauq-e-zunnar hai gulu ka

hain gharq-e-bahr-e-mai-e-mohabbat wahan hai 'kaifi' ye sab ki haalat

hai daKHl saqi ki bazm mein kya surahi-o-saghar-o-subu ka