bataen tum se kya hum aashiq-e-bimar kis ke hain

batā.eñ tum se kyā ham āshiq-e-bīmār kis ke haiñ

hamāre dīda-e-tar tālib-e-dīdār kis ke haiñ

na kyuuñ ham-shakl-e-bulbul mad.h meñ naġhma-sarā huuñ maiñ

tumhīñ mujh ko batā do phuul se ruḳhsār kis ke haiñ

koī be-ḳhud koī bā-ḳhud hue terī mohabbat meñ

jo haiñ ġhāfil vo kis ke haiñ jo haiñ hushyār kis ke haiñ

uThā kar haath meñ tasbīh mujh se dil ye kahtā hai

brahman kis ke haiñ ham sāhib-e-zunnār kis ke haiñ

na kyuuñ bahr-e-shahādat sar jhukā.eñ shauq se 'āshiq

basān-e-teġh kahiye abrū-e-ḳhamdār kis ke haiñ

kahā ye tā.ir-e-dil ne ulajh kar zulf-e-pur-ḳham meñ

phañsāyā kis ne mujh ko aur ye kirdār kis ke haiñ

nahīñ mā'lūm zaḳhmī ho gayā hai kaun shaidā.ī

gul-e-tāza 'jamīla' zaḳhm-e-dāman-dār kis ke haiñ

bataen tum se kya hum aashiq-e-bimar kis ke hain

hamare dida-e-tar talib-e-didar kis ke hain

na kyun ham-shakl-e-bulbul madh mein naghma-sara hun main

tumhin mujh ko bata do phul se ruKHsar kis ke hain

koi be-KHud koi ba-KHud hue teri mohabbat mein

jo hain ghafil wo kis ke hain jo hain hushyar kis ke hain

uTha kar hath mein tasbih mujh se dil ye kahta hai

brahman kis ke hain hum sahib-e-zunnar kis ke hain

na kyun bahr-e-shahadat sar jhukaen shauq se 'ashiq

basan-e-tegh kahiye abru-e-KHamdar kis ke hain

kaha ye tair-e-dil ne ulajh kar zulf-e-pur-KHam mein

phansaya kis ne mujh ko aur ye kirdar kis ke hain

nahin ma'lum zaKHmi ho gaya hai kaun shaidai

gul-e-taza 'jamila' zaKHm-e-daman-dar kis ke hain