bayan-e-shauq bana harf-e-iztirab bana

bayān-e-shauq banā harf-e-iztirāb banā

vo ik savāl ki jis kā na kuchh javāb banā

maiñ ek baab thā afsāna-e-vafā kā magar

tumhārī bazm se uTThā to ik kitāb banā

mujhe safīr banā apnā kū-ba-kū ai ishq

kise havas hai ki duniyā meñ kāmyāb banā

maiñ jis ḳhayāl ko apnā junūñ samajhtā thā

vahī ḳhayāl zamāne kā husn-e-ḳhvāb banā

kabhī to vaj.h-e-karam ban ga.ī hai ḳhuddārī

kabhī niyāz-talab baa.is itaab banā

sarā-e-dil meñ jagah de to kaaT luuñ ik raat

nahīñ ye shart ki mujh ko sharīk-e-ḳhvāb banā

jo ek daaġh kī sūrat rahā shab-e-ummīd

nujūm-e-dil meñ vahī dard āftāb banā

mujhe na ḳhaak meñ milne de ai ġham-e-pinhāñ

jo ban sakūñ to mujhe naqsh-e-lā-javāb banā

mizha se qatra ḳhushī meñ chhalak rahā thā magar

sukūt-e-lab se tire mauj-e-iztirāb banā

bane haiñ ḳhvāb ke jhoñke nasīm-e-ḳhuld-nashīñ

sulūk-e-dahr jahāñ ātish-e-azāb banā

bahut qarīb se dekhā to kho ga.e jalve

nazar hī parda banī husn hī hijāb banā

jo mere dasht-e-junūñ meñ thā farq-e-rū-e-bahār

vahī ḳhirad ke ḳharābe meñ ik gulāb banā

amīr-e-charḳh kā ehsāñ nahīñ hai mujh pe 'na.īm'

mujhe hai naaz ki zarre se āftāb banā

bayan-e-shauq bana harf-e-iztirab bana

wo ek sawal ki jis ka na kuchh jawab bana

main ek bab tha afsana-e-wafa ka magar

tumhaari bazm se uTTha to ek kitab bana

mujhe safir bana apna ku-ba-ku ai ishq

kise hawas hai ki duniya mein kaamyab bana

main jis KHayal ko apna junun samajhta tha

wahi KHayal zamane ka husn-e-KHwab bana

kabhi to wajh-e-karam ban gai hai KHuddari

kabhi niyaz-talab bais itab bana

sara-e-dil mein jagah de to kaT lun ek raat

nahin ye shart ki mujh ko sharik-e-KHwab bana

jo ek dagh ki surat raha shab-e-ummid

nujum-e-dil mein wahi dard aaftab bana

mujhe na KHak mein milne de ai gham-e-pinhan

jo ban sakun to mujhe naqsh-e-la-jawab bana

mizha se qatra KHushi mein chhalak raha tha magar

sukut-e-lab se tere mauj-e-iztirab bana

bane hain KHwab ke jhonke nasim-e-KHuld-nashin

suluk-e-dahr jahan aatish-e-azab bana

bahut qarib se dekha to kho gae jalwe

nazar hi parda bani husn hi hijab bana

jo mere dasht-e-junun mein tha farq-e-ru-e-bahaar

wahi KHirad ke KHarabe mein ek gulab bana

amir-e-charKH ka ehsan nahin hai mujh pe 'naim'

mujhe hai naz ki zarre se aaftab bana