bayaz-e-kohna mein jiddat bhari tahrir rakhni hai

bayāz-e-kohna meñ jiddat bharī tahrīr rakhnī hai

purānī niyām meñ ya.anī na.ī shamshīr rakhnī hai

fasīl-e-fikr se girtā huā misra.a uThānā hai

sirhāne ab mujhe har dam kitāb-e-'mīr' rakhnī hai

mujhe tā-umr ranj-e-qaid ko mahsūs karnā hai

mujhe tā-umr apne paas ye zanjīr rakhnī hai

sajāo ḳhvāb koī raat kī be-rañg āñkhoñ meñ

agar baaqī diloñ meñ ḳhvāhish-e-ta.abīr rakhnī hai

ḳhudī se be-ḳhudī kī jañg hai goyā mujhe is pal

muqābil apne hī apnī koī tasvīr rakhnī hai

hameñ apne lahū se dasht ik gulzār karnā hai

hameñ tā-hashr zinda azmat-e-takbīr rakhnī hai

use duniyā ke har ġham se mukammal paak to kar lo

agar is dil meñ buniyād-e-ġham-e-shabbīr rakhnī hai

bayaz-e-kohna mein jiddat bhari tahrir rakhni hai

purani niyam mein yani nai shamshir rakhni hai

fasil-e-fikr se girta hua misra uThana hai

sirhane ab mujhe har dam kitab-e-'mir' rakhni hai

mujhe ta-umr ranj-e-qaid ko mahsus karna hai

mujhe ta-umr apne pas ye zanjir rakhni hai

sajao KHwab koi raat ki be-rang aankhon mein

agar baqi dilon mein KHwahish-e-tabir rakhni hai

KHudi se be-KHudi ki jang hai goya mujhe is pal

muqabil apne hi apni koi taswir rakhni hai

hamein apne lahu se dasht ek gulzar karna hai

hamein ta-hashr zinda azmat-e-takbir rakhni hai

use duniya ke har gham se mukammal pak to kar lo

agar is dil mein buniyaad-e-gham-e-shabbir rakhni hai