bazm-e-nashat-o-aish ka saman liye hue

bazm-e-nashāt-o-aish kā sāmāñ liye hue

aa.ī sabā bahār-e-gulistāñ liye hue

uḌtā phirā junūn ye sāmāñ liye hue

ya.anī hamāre jeb-o-garebāñ liye hue

kab tak jiyegā dār-e-fanā meñ batā to de

sar meñ ġhurūr-e-ālam-e-imkāñ liye hue

mere junūn-e-ishq kī vus.at na pūchhiye

hai zarra zarra zor-e-bayābāñ liye hue

jis ko uThā sake na pahāḌ aur na āsmāñ

vo bār-e-ġham haiñ hazrat-e-insāñ liye hue

mere liye to bahr-e-alam kā ye haal hai

jo mauj uThī vo aa.ī hai tūfāñ liye hue

ik majma-e-bahār-o-ḳhizāñ hai mirā vajūd

phirtā huuñ saath gardish-e-daurāñ liye hue

āsāñ ho kyuuñ na ahl-e-tajassus ko rāh-e-shauq

haiñ apne saath zauq-e-farāvāñ liye hue

pherī lagā rahā huuñ ḳharīdār kī hai fikr

phirtā huuñ sar pe maiñ ġham-e-daurāñ liye hue

bahar-e-niyāz-e-nāz ham aa.e haiñ le ke dil

dil meñ hujūm-e-hasrat-o-armāñ liye hue

'ḳhushtar' mujhe hai naaz ki allāh ke huzūr

jā.ūñgā dil meñ daulat-e-īmāñ liye hue

bazm-e-nashat-o-aish ka saman liye hue

aai saba bahaar-e-gulistan liye hue

uDta phira junun ye saman liye hue

yani hamare jeb-o-gareban liye hue

kab tak jiyega dar-e-fana mein bata to de

sar mein ghurur-e-alam-e-imkan liye hue

mere junun-e-ishq ki wusat na puchhiye

hai zarra zarra zor-e-bayaban liye hue

jis ko uTha sake na pahaD aur na aasman

wo bar-e-gham hain hazrat-e-insan liye hue

mere liye to bahr-e-alam ka ye haal hai

jo mauj uThi wo aai hai tufan liye hue

ek majma-e-bahaar-o-KHizan hai mera wajud

phirta hun sath gardish-e-dauran liye hue

aasan ho kyun na ahl-e-tajassus ko rah-e-shauq

hain apne sath zauq-e-farawan liye hue

pheri laga raha hun KHaridar ki hai fikr

phirta hun sar pe main gham-e-dauran liye hue

bahar-e-niyaz-e-naz hum aae hain le ke dil

dil mein hujum-e-hasrat-o-arman liye hue

'KHushtar' mujhe hai naz ki allah ke huzur

jaunga dil mein daulat-e-iman liye hue