bazm mein zikr mera lab pe wo lae to sahi

bazm meñ zikr mirā lab pe vo laa.e to sahī

vahīñ mālūm karūñ hoñT hilā.e to sahī

sañg par sañg har ik kūche meñ khaa.e to sahī

par balā se tire dīvāne khaa.e to sahī

go janāze pe nahīñ qabr pe aa.e vo mirī

shikva kyā kiije ġhanīmat hai ki aa.e to sahī

kyūñki dīvār pe chaḌh jā.ūñ koī kahtā hai

paañv kāTūñgā añgūThā vo jamā.e to sahī

pāra-e-mus.haf-e-dil the tire kūche meñ paḌe

aate paañv ke tale shukr ki paa.e to sahī

saaf be-parda nahīñ hotā vo ġhurfa meñ na ho

rauzan-e-dar se kabhī aañkh laḌā.e to sahī

gah baḌhātā hai gahe mah ko ghaTātā hai falak

par shab-e-hijr ko ham dekheñ ghaTā.e to sahī

karūñ ik naale se maiñ hashr meñ barpā sau hashr

shor-e-mahshar mujhe sote se jagā.e to sahī

gir paḌe the ka.ī us kūche meñ dil ke TukḌe

aate paañv ke tale shukr ki paa.e to sahī

the tumhīñ nikle jo us dām-e-balā se ai 'zauq'

varna the pech meñ us zulf ke aa.e to sahī

bazm mein zikr mera lab pe wo lae to sahi

wahin malum karun honT hilae to sahi

sang par sang har ek kuche mein khae to sahi

par bala se tere diwane khae to sahi

go janaze pe nahin qabr pe aae wo meri

shikwa kya kije ghanimat hai ki aae to sahi

kyunki diwar pe chaDh jaun koi kahta hai

panw kaTunga anguTha wo jamae to sahi

para-e-mushaf-e-dil the tere kuche mein paDe

aate panw ke tale shukr ki pae to sahi

saf be-parda nahin hota wo ghurfa mein na ho

rauzan-e-dar se kabhi aankh laDae to sahi

gah baDhata hai gahe mah ko ghaTata hai falak

par shab-e-hijr ko hum dekhen ghaTae to sahi

karun ek nale se main hashr mein barpa sau hashr

shor-e-mahshar mujhe sote se jagae to sahi

gir paDe the kai us kuche mein dil ke TukDe

aate panw ke tale shukr ki pae to sahi

the tumhin nikle jo us dam-e-bala se ai 'zauq'

warna the pech mein us zulf ke aae to sahi