bazm se aaKHir-e-shab hai safar-e-jam-e-sharab

bazm se āḳhir-e-shab hai safar-e-jām-e-sharāb

shām-e-ġhurbat huī saaqī sahar-e-jām-e-sharāb

mast-o-sarshār ko sarshār sañbhāle kyā ḳhaak

na thamī dast-e-subū se kamar-e-jām-e-sharāb

kasrat-e-majma-e-aġhyār se mahrūm rahā

na huā bazm meñ mujh tak guzar-e-jām-e-sharāb

mohtasib degā javāb apne sitam kā tū kyā

kal jo kausar pe huā dād-gar-e-jām-e-sharāb

ye bhī ai mohtasib us laal parī kā hai asar

uḌ ke pahuñchī hai jo tujh tak ḳhabar-e-jām-e-sharāb

bazm-e-dushman meñ rahe aap to suufī ban kar

surḳh āñkhoñ meñ kahāñ hai asar-e-jām-e-sharāb

nahīñ mā'lūm ki ai 'dāġh' hai tū kis dhun meñ

na talāsh-e-but-e-mah-vash na sar-e-jām-e-sharāb

bazm se aaKHir-e-shab hai safar-e-jam-e-sharab

sham-e-ghurbat hui saqi sahar-e-jam-e-sharab

mast-o-sarshaar ko sarshaar sanbhaale kya KHak

na thami dast-e-subu se kamar-e-jam-e-sharab

kasrat-e-majma-e-aghyar se mahrum raha

na hua bazm mein mujh tak guzar-e-jam-e-sharab

mohtasib dega jawab apne sitam ka tu kya

kal jo kausar pe hua dad-gar-e-jam-e-sharab

ye bhi ai mohtasib us lal pari ka hai asar

uD ke pahunchi hai jo tujh tak KHabar-e-jam-e-sharab

bazm-e-dushman mein rahe aap to sufi ban kar

surKH aankhon mein kahan hai asar-e-jam-e-sharab

nahin ma'lum ki ai 'dagh' hai tu kis dhun mein

na talash-e-but-e-mah-wash na sar-e-jam-e-sharab