be-asar aarzu be-asar hai dua

be-asar aarzū be-asar hai duā

bā-asar hai faqat ek us kī razā

vo gunahgār mahshar meñ baḳhshā gayā

rahmat-e-haq pe jis ne bharosā kiyā

zindagī ne mujhe muñh lagāyā na jab

muñh chiḌhāne lagī merā zālim qazā

dast-e-qudrat meñ maiñ ik khilaunā sā huuñ

kis liye hai gunāhoñ kī mujh ko sazā

naujavānī meñ to mahv-e-ishrat rahe

ab buḌhāpe meñ aa.ī hai yād-e-ḳhudā

dil kisī ke tasavvur meñ khoyā rahe

dard-e-dil kī yahī hai faqat ik davā

vaqt aisā bhī aatā hai insān par

honā paḌtā hai maidāñ meñ tanhā khaḌā

jaane kyoñ aaj 'lāġhar' ne chup saadh lī

varna vo roz detā thā haq kī sadā

be-asar aarzu be-asar hai dua

ba-asar hai faqat ek us ki raza

wo gunahgar mahshar mein baKHsha gaya

rahmat-e-haq pe jis ne bharosa kiya

zindagi ne mujhe munh lagaya na jab

munh chiDhane lagi mera zalim qaza

dast-e-qudrat mein main ek khilauna sa hun

kis liye hai gunahon ki mujh ko saza

naujawani mein to mahw-e-ishrat rahe

ab buDhape mein aai hai yaad-e-KHuda

dil kisi ke tasawwur mein khoya rahe

dard-e-dil ki yahi hai faqat ek dawa

waqt aisa bhi aata hai insan par

hona paDta hai maidan mein tanha khaDa

jaane kyon aaj 'laghar' ne chup sadh li

warna wo roz deta tha haq ki sada