be-gham-e-ishq-o-be-dil-e-agah

be-ġham-e-'ishq-o-be-dil-e-āgāh

maut bhī jurm zindagī bhī gunāh

maiñ chalā jā rahā thā apnī raah

sāmne aap aa ga.e nāgāh

kis kā shikva kahāñ kā hāl-e-tabāh

uf vo nāzuk sī zer-e-lab ik aah

jo tirī bazm terī jaulāñ-gāh

dil vahī dil vahī nigāh nigāh

sāya-e-zulf-e-yār kyā kahnā

zindagī ko na thī kahīñ bhī panāh

kyā ġhazab hai ki ik zamāne se

aadmī ko taras rahī rahī hai nigāh

'ishq hī us ko jāntā hai ki hai

ik nigah aur bhī varā-e-nigāh

mai-kade meñ kahāñ janāb-e-shaiḳh

aa hī nikle to ḳhair bismillāh

aap phūloñ se jholiyāñ bhar leñ

ham ne kāñToñ se kar liyā hai nibāh

ab ġham-e-do-jahāñ bhī rāhat hai

ai ġham-e-'āshiqī jazāk-allāh

maiñ bahar-hāl huuñ firāq-nasīb

tū ba-har-rang hai mire hamrāh

be-gham-e-'ishq-o-be-dil-e-agah

maut bhi jurm zindagi bhi gunah

main chala ja raha tha apni rah

samne aap aa gae nagah

kis ka shikwa kahan ka haal-e-tabah

uf wo nazuk si zer-e-lab ek aah

jo teri bazm teri jaulan-gah

dil wahi dil wahi nigah nigah

saya-e-zulf-e-yar kya kahna

zindagi ko na thi kahin bhi panah

kya ghazab hai ki ek zamane se

aadmi ko taras rahi rahi hai nigah

'ishq hi us ko jaanta hai ki hai

ek nigah aur bhi wara-e-nigah

mai-kade mein kahan janab-e-shaiKH

aa hi nikle to KHair bismillah

aap phulon se jholiyan bhar len

hum ne kanTon se kar liya hai nibah

ab gham-e-do-jahan bhi rahat hai

ai gham-e-'ashiqi jazak-allah

main bahar-haal hun firaq-nasib

tu ba-har-rang hai mere hamrah