be-gunahi ka har ehsas miTa de koi

be-gunāhī kā har ehsās miTā de koī

mujh ko is daur meñ jiine kī sazā de koī

naqsh yādoñ ke sabhī dil se miTā de koī

hosh meñ huuñ mujhe dīvāna banā de koī

koī is shahr meñ suntā nahīñ dil kī āvāz

kis tavaqqo pe kahīñ jā ke sadā de koī

aaj bhī jin ko hai apnoñ se vafā kī ummīd

merī tasvīr unheñ jā ke dikhā de koī

merā maazī mujhe kyā jaane kahāñ chhoḌ gayā

maiñ kahāñ dafn huuñ itnā to batā de koī

ġhairat-e-dast-e-talab baat to jab hai terī

apnā dāman hī tirī samt baḌhā de koī

hosh vāloñ ne to kar rakkhā hai duniyā ko tabāh

mujh ko is daur meñ dīvāna banā de koī

tauba to kī hai magar ab bhī ye hasrat hai 'shamīm'

de ke qasmeñ mujhe ik baar pilā de koī

be-gunahi ka har ehsas miTa de koi

mujh ko is daur mein jine ki saza de koi

naqsh yaadon ke sabhi dil se miTa de koi

hosh mein hun mujhe diwana bana de koi

koi is shahr mein sunta nahin dil ki aawaz

kis tawaqqo pe kahin ja ke sada de koi

aaj bhi jin ko hai apnon se wafa ki ummid

meri taswir unhen ja ke dikha de koi

mera mazi mujhe kya jaane kahan chhoD gaya

main kahan dafn hun itna to bata de koi

ghairat-e-dast-e-talab baat to jab hai teri

apna daman hi teri samt baDha de koi

hosh walon ne to kar rakkha hai duniya ko tabah

mujh ko is daur mein diwana bana de koi

tauba to ki hai magar ab bhi ye hasrat hai 'shamim'

de ke qasmen mujhe ek bar pila de koi