be-kaif dil hai aur jiye ja raha hun main

be-kaif dil hai aur jiye jā rahā huuñ maiñ

ḳhālī hai shīsha aur piye jā rahā huuñ maiñ

paiham jo aah aah kiye jā rahā huuñ maiñ

daulat hai ġham zakāt diye jā rahā huuñ maiñ

majbūri-e-kamāl-e-mohabbat to dekhnā

jiinā nahīñ qubūl jiye jā rahā huuñ maiñ

vo dil kahāñ hai ab ki jise pyaar kījiye

majbūriyāñ haiñ saath diye jā rahā huuñ maiñ

ruḳhsat huī shabāb ke hamrāh zindagī

kahne kī baat hai ki jiye jā rahā huuñ maiñ

pahle sharāb ziist thī ab ziist hai sharāb

koī pilā rahā hai piye jā rahā huuñ maiñ

be-kaif dil hai aur jiye ja raha hun main

KHali hai shisha aur piye ja raha hun main

paiham jo aah aah kiye ja raha hun main

daulat hai gham zakat diye ja raha hun main

majburi-e-kamal-e-mohabbat to dekhna

jina nahin qubul jiye ja raha hun main

wo dil kahan hai ab ki jise pyar kijiye

majburiyan hain sath diye ja raha hun main

ruKHsat hui shabab ke hamrah zindagi

kahne ki baat hai ki jiye ja raha hun main

pahle sharab zist thi ab zist hai sharab

koi pila raha hai piye ja raha hun main