be-kasi ruKH badal hi jati hai

be-kasī ruḳh badal hī jaatī hai

aah muñh se nikal hī jaatī hai

husn ho aish ho javānī ho

dhuup āḳhir ko Dhal hī jaatī hai

hai ġham-e-ishq mustaqil varna

har balā sar se Tal hī jaatī hai

phuul karte raheñ jatan lākhoñ

bū chaman se nikal hī jaatī hai

jānte ham bhī haiñ ma.āl-e-nashāt

hasrat-e-dil machal hī jaatī hai

merī majbūriyoñ pe un kī nazar

haath dar-parda mal hī jaatī hai

dekh kar kāmrānī-e-tadbīr

chaal qismat bhī chal hī jaatī hai

Thokareñ khā ke fitrat-e-insān

rāh-e-ġham meñ sañbhal hī jaatī hai

nazm bhī tarjumān-e-dil hai 'adīb'

pesh lekin ġhazal hī jaatī hai

be-kasi ruKH badal hi jati hai

aah munh se nikal hi jati hai

husn ho aish ho jawani ho

dhup aaKHir ko Dhal hi jati hai

hai gham-e-ishq mustaqil warna

har bala sar se Tal hi jati hai

phul karte rahen jatan lakhon

bu chaman se nikal hi jati hai

jaante hum bhi hain maal-e-nashat

hasrat-e-dil machal hi jati hai

meri majburiyon pe un ki nazar

hath dar-parda mal hi jati hai

dekh kar kaamrani-e-tadbir

chaal qismat bhi chal hi jati hai

Thokaren kha ke fitrat-e-insan

rah-e-gham mein sanbhal hi jati hai

nazm bhi tarjuman-e-dil hai 'adib'

pesh lekin ghazal hi jati hai