be-KHud aisa kiya KHauf-e-shab-e-tanhai ne

be-ḳhud aisā kiyā ḳhauf-e-shab-e-tanhā.ī ne

subah se sham.a jalā dī tire saudā.ī ne

hasb-e-manshā dil-e-pur-shauq kī bātoñ kā javāb

de diyā sharm meñ Duubī huī añgḌā.ī ne

hū kā aalam huā us samt ko uḌne lagī ḳhaak

jis taraf ġhaur se dekhā tire saudā.ī ne

qatl par mere bahā.e na kisī ne aañsū

daad qātil ko dī ik ek tamāshā.ī ne

pūchhne vaale bharī bazm meñ qātil ko na pūchh

naam terā hī agar le diyā saudā.ī ne

māñgtā huuñ dar-o-dīvār se bātoñ kā javāb

aisā dīvāna kiyā hai ġham-e-tanhā.ī ne

hijr kī rātoñ meñ 'manzar' mire kaam aa aa ke

le liyā mol charāġh-e-shab-e-tanhā.ī ne

be-KHud aisa kiya KHauf-e-shab-e-tanhai ne

subah se shama jala di tere saudai ne

hasb-e-mansha dil-e-pur-shauq ki baaton ka jawab

de diya sharm mein Dubi hui angDai ne

hu ka aalam hua us samt ko uDne lagi KHak

jis taraf ghaur se dekha tere saudai ne

qatl par mere bahae na kisi ne aansu

dad qatil ko di ek ek tamashai ne

puchhne wale bhari bazm mein qatil ko na puchh

nam tera hi agar le diya saudai ne

mangta hun dar-o-diwar se baaton ka jawab

aisa diwana kiya hai gham-e-tanhai ne

hijr ki raaton mein 'manzar' mere kaam aa aa ke

le liya mol charagh-e-shab-e-tanhai ne