be-KHudi hai hasraton ki bhiD chhaT jaane ke baad

be-ḳhudī hai hasratoñ kī bhiiḌ chhaT jaane ke ba.ad

aap hī gum ho ga.e ham rāsta paane ke ba.ad

maiñ huuñ vo sho.ala bhaḌaktā hai jo bujh jaane ke ba.ad

maiñ huuñ aisā phuul khiltā hai jo murjhāne ke ba.ad

mil ga.e ham ḳhaak meñ parde ke uTh jaane ke ba.ad

kuchh nazar aane se pahle kuchh nazar aane ke ba.ad

kis tarah jalve ko dekhā dekh kar kyā ho gayā

dekhne vāloñ ko dekho jalva dikhlāne ke ba.ad

maut hai jis kī sazā ye zindagī hai vo gunāh

in balāoñ se milegā amn mar jaane ke ba.ad

yuuñ to parde hī meñ rahtī hai tumheñ sab kī ḳhabar

kaash dekho parde se bāhar nikal aane ke ba.ad

dekh kar māyūs dil ko dekhtā huuñ sū-e-arsh

lā-makāñ hī sūjhtā hai aise vīrāne ke ba.ad

chhoḌ kar tauf-e-haram hai kyā pashemānī mujhe

gardish-e-qismat meñ apne aap aa jaane ke ba.ad

un ke rauze se mujhe kyuuñ le chalī hai sū-e-ḳhuld

ai ajal kyuuñ kar jiyūñgā us ke chhuT jaane ke ba.ad

kyā ho idrāk-e-tajallī se vo be-ḳhud kāmyāb

jaan se jaanā hoñ jis ko hosh meñ aane ke ba.ad

haa.e ye apnī javānī aur ye baḳht-e-siyāh

ye añdherī koTharī phir raat ho jaane ke ba.ad

tū ne ai saaqī kiyā andāza-e-mastī ġhalat

yuuñ hī detā jā mujhe paimāna paimāne ke ba.ad

marg par āmāda terī sard-mehrī ne kiyā

niiñd mujh ko aa ga.ī ThanDī havā khāne ke ba.ad

jazb-e-ulfat hī se paidā hotī hai shakl-e-kashish

varna kyuuñ jazb-e-nazar ho kuchh nazar aane ke ba.ad

apne jalve ke karishme ye mirā zauq-e-nigāh

tum zarā dekho mirī āñkhoñ meñ phir jaane ke ba.ad

vo atā-e-avval-e-sāqī bhī 'rāġhib' ḳhuub thī

ham ne lākhoñ ḳhum chaḌhā.e ek paimāne ke ba.ad

be-KHudi hai hasraton ki bhiD chhaT jaane ke baad

aap hi gum ho gae hum rasta pane ke baad

main hun wo shoala bhaDakta hai jo bujh jaane ke baad

main hun aisa phul khilta hai jo murjhane ke baad

mil gae hum KHak mein parde ke uTh jaane ke baad

kuchh nazar aane se pahle kuchh nazar aane ke baad

kis tarah jalwe ko dekha dekh kar kya ho gaya

dekhne walon ko dekho jalwa dikhlane ke baad

maut hai jis ki saza ye zindagi hai wo gunah

in balaon se milega amn mar jaane ke baad

yun to parde hi mein rahti hai tumhein sab ki KHabar

kash dekho parde se bahar nikal aane ke baad

dekh kar mayus dil ko dekhta hun su-e-arsh

la-makan hi sujhta hai aise virane ke baad

chhoD kar tauf-e-haram hai kya pashemani mujhe

gardish-e-qismat mein apne aap aa jaane ke baad

un ke rauze se mujhe kyun le chali hai su-e-KHuld

ai ajal kyun kar jiyunga us ke chhuT jaane ke baad

kya ho idrak-e-tajalli se wo be-KHud kaamyab

jaan se jaana hon jis ko hosh mein aane ke baad

hae ye apni jawani aur ye baKHt-e-siyah

ye andheri koThari phir raat ho jaane ke baad

tu ne ai saqi kiya andaza-e-masti ghalat

yun hi deta ja mujhe paimana paimane ke baad

marg par aamada teri sard-mehri ne kiya

nind mujh ko aa gai ThanDi hawa khane ke baad

jazb-e-ulfat hi se paida hoti hai shakl-e-kashish

warna kyun jazb-e-nazar ho kuchh nazar aane ke baad

apne jalwe ke karishme ye mera zauq-e-nigah

tum zara dekho meri aankhon mein phir jaane ke baad

wo ata-e-awwal-e-saqi bhi 'raghib' KHub thi

hum ne lakhon KHum chaDhae ek paimane ke baad