be-KHudi mein munh se jo nikla suKHan sabit hua

be-ḳhudī meñ muñh se jo niklā suḳhan sābit huā

aql se behtar mirā dīvāna-pan sābit huā

morid-e-ilzām Thahrāyā gayā ham ko magar

vaj.h-e-rusvā.ī nizām-e-anjuman sābit huā

ġhair chehre ajnabī māhaul mub.ham se nuqūsh

maiñ jahāñ pahuñchā vahī merā vatan sābit huā

ek lamhe ko bahāroñ se hue the ham-kalām

ek muddat meñ hamārā pairahan sābit huā

kis qadar nāzuk thī vo ehsās kī manzil ki jab

dostoñ kā mashvara bhī dil-shikan sābit huā

be-KHudi mein munh se jo nikla suKHan sabit hua

aql se behtar mera diwana-pan sabit hua

morid-e-ilzam Thahraya gaya hum ko magar

wajh-e-ruswai nizam-e-anjuman sabit hua

ghair chehre ajnabi mahaul mubham se nuqush

main jahan pahuncha wahi mera watan sabit hua

ek lamhe ko bahaaron se hue the ham-kalam

ek muddat mein hamara pairahan sabit hua

kis qadar nazuk thi wo ehsas ki manzil ki jab

doston ka mashwara bhi dil-shikan sabit hua