be-libasi ku-ba-ku aisi na thi

be-libāsī kū-ba-kū aisī na thī

zindagī be-ābrū aisī na thī

is qadar nāzuk na thā us kā mizāj

talḳh merī guftugū aisī na thī

dasht-e-jāñ meñ aisā sannāTā na thā

ye fazā-e-rang-o-bū aisī na thī

lamha lamha bojh ban kar rah gayā

zindagī kī aarzū aisī na thī

rehn karte jā ke ham apnā zamīr

ḳhvāhish-e-jām-o-subū aisī na thī

sho.ala-e-ruḳh se bujhī āñkhoñ kī pyaas

aag meñ paanī kī ḳhū aisī na thī

shahr jaane kyoñ huā apnā harīf

shahr meñ kuchh aabrū aisī na thī

kah rahā huuñ hāl-e-dil aġhyār se

dil ko terī justujū aisī na thī

be-libasi ku-ba-ku aisi na thi

zindagi be-abru aisi na thi

is qadar nazuk na tha us ka mizaj

talKH meri guftugu aisi na thi

dasht-e-jaan mein aisa sannaTa na tha

ye faza-e-rang-o-bu aisi na thi

lamha lamha bojh ban kar rah gaya

zindagi ki aarzu aisi na thi

rehn karte ja ke hum apna zamir

KHwahish-e-jam-o-subu aisi na thi

shoala-e-ruKH se bujhi aankhon ki pyas

aag mein pani ki KHu aisi na thi

shahr jaane kyon hua apna harif

shahr mein kuchh aabru aisi na thi

kah raha hun haal-e-dil aghyar se

dil ko teri justuju aisi na thi