be-mani la-hasil raddi sheron ka hai jal udhar

be-ma.anī lā-hāsil raddī sheroñ kā hai jaal udhar

jo chīzeñ be-kār haiñ pyāre un chīzoñ ko Daal udhar

kuchh tajvīzeñ paas karegā vaqt ke hāthoñ ye ijlās

majbūr-o-nādār idhar haiñ āsūda ḳhush-hāl udhar

biich meñ haa.il kar de koī kaash takalluf kī dīvār

udhar hai relā gul-chīnoñ kā aur guloñ meñ kaal idhar

ḳhūn-e-tamannā kī surḳhī se dil kī hikāyat hai rañgīñ

dāman kī taqdīr idhar hai gulshan kā iqbāl udhar

un kī bazm se aane vaale thaam ke dil farmāte haiñ

jaane vaalo udhar na jaao jurm hai arz-e-hāl udhar

jalsa-e-ġham kī tayyārī meñ udhar haiñ jiite jī masrūf

paidā.ish kā jashn manāyā yāroñ ne har saal udhar

ik muddat se dekh rahā huuñ hotā hai har baar yahī

idhar 'sabā' ne ḳhvāb sajāyā vaqt ne badlī chaal udhar

be-mani la-hasil raddi sheron ka hai jal udhar

jo chizen be-kar hain pyare un chizon ko Dal udhar

kuchh tajwizen pas karega waqt ke hathon ye ijlas

majbur-o-nadar idhar hain aasuda KHush-haal udhar

bich mein hail kar de koi kash takalluf ki diwar

udhar hai rela gul-chinon ka aur gulon mein kal idhar

KHun-e-tamanna ki surKHi se dil ki hikayat hai rangin

daman ki taqdir idhar hai gulshan ka iqbaal udhar

un ki bazm se aane wale tham ke dil farmate hain

jaane walo udhar na jao jurm hai arz-e-haal udhar

jalsa-e-gham ki tayyari mein udhar hain jite ji masruf

paidaish ka jashn manaya yaron ne har sal udhar

ek muddat se dekh raha hun hota hai har bar yahi

idhar 'saba' ne KHwab sajaya waqt ne badli chaal udhar