be-qararon ko kab qarar aaya

be-qarāroñ ko kab qarār aayā

maut bhī aa.ī par na yaar aayā

jab huā jism ḳhaak yaar aayā

gard uTThī to shahsavār aayā

luT gayā kārvān-e-sabr-o-qarār

qāsid-e-ashk ashk-bār aayā

ḳhas se jaise charāġh jaltā hai

daaġh ke kaam jism-e-zār aayā

gar koī ḳhāksār ḳhaak huā

ḳhaak uḌāne mirā ġhubār aayā

kāsa-e-charḳh vāzhgūñ hī rahā

jā ke mujh sā na bāda-ḳhvār aayā

zulf se sair rū-e-rañgīñ kī

daam meñ mausam-e-bahār aayā

loTiye misl-e-māhī-e-be-āb

ki sar-e-teġh-e-ābdār aayā

us ne sau baar haal pūchhā 'arsh'

shikva lab par na ek baar aayā

be-qararon ko kab qarar aaya

maut bhi aai par na yar aaya

jab hua jism KHak yar aaya

gard uTThi to shahsawar aaya

luT gaya karwan-e-sabr-o-qarar

qasid-e-ashk ashk-bar aaya

KHas se jaise charagh jalta hai

dagh ke kaam jism-e-zar aaya

gar koi KHaksar KHak hua

KHak uDane mera ghubar aaya

kasa-e-charKH wazhgun hi raha

ja ke mujh sa na baada-KHwar aaya

zulf se sair ru-e-rangin ki

dam mein mausam-e-bahaar aaya

loTiye misl-e-mahi-e-be-ab

ki sar-e-tegh-e-abdar aaya

us ne sau bar haal puchha 'arsh'

shikwa lab par na ek bar aaya