be-sabab hath kaTari ko lagana kya tha

be-sabab haath kaTārī ko lagānā kyā thā

qatl-e-ushshāq pe beḌā ye uThānā kyā thā

sar pe apne tū na le ḳhuun ab ik 'ālam kā

funduq-hā-e-nigārīñ ko dikhānā kyā thā

sar-bulandī ko yahāñ dil ne na chāhā mun.im

varna ye ḳhema-e-aflāk purānā kyā thā

is liye chīn-e-jabīñ mauj rahe hai har dam

ai hubāb-e-lab-e-jū aañkh churānā kyā thā

sāqiyā apnī balā se jo ghaTā uTThī hai

de ke ik jur.a-e-mai dil ko ghaTānā kyā thā

sarzamīñ zulf kī jāgīr meñ thī is dil kī

varna ik daam kā phir is meñ Thikānā kyā thā

kah ġhazal dūsrī is bahr meñ ek aur 'nasīr'

yak qalam likhne se ab haath uThānā kyā thā

be-sabab hath kaTari ko lagana kya tha

qatl-e-ushshaq pe beDa ye uThana kya tha

sar pe apne tu na le KHun ab ek 'alam ka

funduq-ha-e-nigarin ko dikhana kya tha

sar-bulandi ko yahan dil ne na chaha munim

warna ye KHema-e-aflak purana kya tha

is liye chin-e-jabin mauj rahe hai har dam

ai hubab-e-lab-e-ju aankh churana kya tha

saqiya apni bala se jo ghaTa uTThi hai

de ke ek jura-e-mai dil ko ghaTana kya tha

sarzamin zulf ki jagir mein thi is dil ki

warna ek dam ka phir is mein Thikana kya tha

kah ghazal dusri is bahr mein ek aur 'nasir'

yak qalam likhne se ab hath uThana kya tha