be-tab pas shama ke parwana aa gaya

be-tāb paas sham.a ke parvāna aa gayā

kyā baat hai ki hosh meñ dīvāna aa gayā

saaqī kī bārgāh meñ tauba huī qubūl

ḳhud DhūñDhtā huā mujhe mai-ḳhāna aa gayā

sajdoñ kā mere naaz uThāne ke vāste

ka.abe ke sāmne dar-e-jānāna aa gayā

dāman ko mere dekh ke hasrat ke haath meñ

yaad un ko apnā lutf-e-karīmāna aa gayā

mujh ko mire savāl pe baḳhshā hai do-jahāñ

ab e'tibār-e-tarz-e-faqīrāna aa gayā

thī shaiḳh-o-barhaman kī mai-o-añgbīñ pe bahas

itne meñ baḌh ke 'kaifī'-e-dīvāna aa gayā

be-tab pas shama ke parwana aa gaya

kya baat hai ki hosh mein diwana aa gaya

saqi ki bargah mein tauba hui qubul

KHud DhunDhta hua mujhe mai-KHana aa gaya

sajdon ka mere naz uThane ke waste

kabe ke samne dar-e-jaanana aa gaya

daman ko mere dekh ke hasrat ke hath mein

yaad un ko apna lutf-e-karimana aa gaya

mujh ko mere sawal pe baKHsha hai do-jahan

ab e'tibar-e-tarz-e-faqirana aa gaya

thi shaiKH-o-barhaman ki mai-o-angbin pe bahas

itne mein baDh ke 'kaifi'-e-diwana aa gaya