be-talab kar ke zarurat bhi chali jae agar

be-talab kar ke zarūrat bhī chalī jaa.e agar

Dar rahī huuñ ki ye vahshat bhī chalī jaa.e agar

shaam hote hī sitāroñ se ye pūchhā aksar

shaam hone kī ye sūrat bhī chalī jaa.e agar

ik tirā dard salīqe se sambhālā lekin

dīda-e-tar se tarāvat bhī chalī jaa.e agar

ye to hai ḳhūn-e-jigar chāhiye lekin ai dil

sher kahne kī ri.āyat bhī chalī jaa.e agar

maiñ to hairān pareshān yahī sochtī huuñ

ā.īna ḳhāne se hairat bhī chalī jaa.e agar

ik nazar bhar kā hī saudā chalo manzūr hameñ

kam-nigāhī kī ye mohlat bhī chalī jaa.e agar

vo gayā hai to mujhe kaam hī ab koī nahīñ

kyā hī achchhā ho ki fursat bhī chalī jaa.e agar

dil ke malbe meñ tamannā ne ye hasrat se kahā

kyā ho ta.amīr kī hasrat bhī chalī jaa.e agar

terī furqat baḌī dushvār magar aise meñ

yaad karne kī suhulat bhī chalī jaa.e agar

ab nashāt-e-ġham-e-furqat se savāl itnā hai

tāziya-dārī kī lazzat bhī chalī jaa.e agar

be-talab kar ke zarurat bhi chali jae agar

Dar rahi hun ki ye wahshat bhi chali jae agar

sham hote hi sitaron se ye puchha aksar

sham hone ki ye surat bhi chali jae agar

ek tera dard saliqe se sambhaala lekin

dida-e-tar se tarawat bhi chali jae agar

ye to hai KHun-e-jigar chahiye lekin ai dil

sher kahne ki riayat bhi chali jae agar

main to hairan pareshan yahi sochti hun

aaina KHane se hairat bhi chali jae agar

ek nazar bhar ka hi sauda chalo manzur hamein

kam-nigahi ki ye mohlat bhi chali jae agar

wo gaya hai to mujhe kaam hi ab koi nahin

kya hi achchha ho ki fursat bhi chali jae agar

dil ke malbe mein tamanna ne ye hasrat se kaha

kya ho tamir ki hasrat bhi chali jae agar

teri furqat baDi dushwar magar aise mein

yaad karne ki suhulat bhi chali jae agar

ab nashat-e-gham-e-furqat se sawal itna hai

taziya-dari ki lazzat bhi chali jae agar