be-tarah in mein ulajh jaega nadani na kar

be-tarah in meñ ulajh jā.egā nādānī na kar

vāqi.āt-e-umr-e-rafta par nazar saanī na kar

dil pe jo guzrī hai us par ashk-afshānī na kar

zindagī kī anjuman meñ marsiya-ḳhvānī na kar

kyā zarūrī hai ki ye dukh bāñTne vaale bhī hoñ

milne vāloñ se kabhī zikr-e-pareshānī na kar

ārzūoñ ko na rakh har chiiz se baḌh kar aziiz

tez tar kāñTe haiñ ye un kī nigahbānī na kar

vaqt ke bigḌe hue atvār kā andāz dekh

zindagī meñ har-qadam par apnī man-mānī na kar

kashtī-o-tūfān ke ik naaz se rishte ko samajh

halqa-e-tūfāñ meñ rah kar apnī man-mānī na kar

'arsh' is meñ talḳhī-e-ġham ke sivā kuchh bhī nahīñ

tū kitāb-e-zindagī kī safha-gardānī na kar

be-tarah in mein ulajh jaega nadani na kar

waqiat-e-umr-e-rafta par nazar sani na kar

dil pe jo guzri hai us par ashk-afshani na kar

zindagi ki anjuman mein marsiya-KHwani na kar

kya zaruri hai ki ye dukh banTne wale bhi hon

milne walon se kabhi zikr-e-pareshani na kar

aarzuon ko na rakh har chiz se baDh kar aziz

tez tar kanTe hain ye un ki nigahbani na kar

waqt ke bigDe hue atwar ka andaz dekh

zindagi mein har-qadam par apni man-mani na kar

kashti-o-tufan ke ek naz se rishte ko samajh

halqa-e-tufan mein rah kar apni man-mani na kar

'arsh' is mein talKHi-e-gham ke siwa kuchh bhi nahin

tu kitab-e-zindagi ki safha-gardani na kar