be-wafa go mile na tu mujhko

be-vafā go mile na tū mujh ko

bas hai terī ye aarzū mujh ko

gardish-e-charḳh se nahīñ pardā

sar pe chahiye vo ḳhāk-e-kū mujh ko

zāhidā hai mirī namāz niyāz

ḳhūn-e-dil ronā hai vazū mujh ko

nāsehā jā ki zikr-e-ishq sivā

ḳhush nahīñ aatī guftugū mujh ko

ban rahā huuñ maiñ ishq kā mazlūm

na satā ai raqīb tū mujh ko

tujh se chāhūñ huuñ nāz-bardārī

ho ga.ī kuchh tirī sī ḳhū mujh ko

sohbat-e-ġhair se huā makrūh

baiThnā tere rū-ba-rū mujh ko

tujh se mahrūm yuuñ rahūñ sad-haif

kyā kyā dil meñ thiiñ aarzū mujh ko

yaar harjā.ī ne kiyā 'hasrat'

dar-ba-dar aur kū-ba-kū mujh ko

be-wafa go mile na tu mujh ko

bas hai teri ye aarzu mujh ko

gardish-e-charKH se nahin parda

sar pe chahiye wo KHak-e-ku mujh ko

zahida hai meri namaz niyaz

KHun-e-dil rona hai wazu mujh ko

naseha ja ki zikr-e-ishq siwa

KHush nahin aati guftugu mujh ko

ban raha hun main ishq ka mazlum

na sata ai raqib tu mujh ko

tujh se chahun hun naz-bardari

ho gai kuchh teri si KHu mujh ko

sohbat-e-ghair se hua makruh

baiThna tere ru-ba-ru mujh ko

tujh se mahrum yun rahun sad-haif

kya kya dil mein thin aarzu mujh ko

yar harjai ne kiya 'hasrat'

dar-ba-dar aur ku-ba-ku mujh ko