be-yar shahr dil ka viran ho raha hai

be-yār shahr dil kā vīrān ho rahā hai

dikhlā.ī de jahāñ tak maidān ho rahā hai

is manzil-e-jahāñ ke bāshinde raftanī haiñ

har ik ke haañ safar kā sāmān ho rahā hai

achchhā lagā hai shāyad āñkhoñ meñ yaar apnī

ā.īna dekh kar kuchh hairān ho rahā hai

gul dekh kar chaman meñ tujh ko khilā hī jā hai

ya.anī hazār jī se qurbān ho rahā hai

hāl-e-zabūn apnā poshīda kuchh na thā to

suntā na thā ki ye said be-jān ho rahā hai

zālim idhar kī sudh le juuñ sham-e-sub.h-gāhī

ek aadh dam kā āshiq mehmān ho rahā hai

qurbāñ-gah-e-mohabbat vo jā hai jis meñ har sū

dushvār jaan denā āsān ho rahā hai

har shab galī meñ us kī rote to rahte ho tum

ik roz 'mīr' sāhab tūfān ho rahā hai

be-yar shahr dil ka viran ho raha hai

dikhlai de jahan tak maidan ho raha hai

is manzil-e-jahan ke bashinde raftani hain

har ek ke han safar ka saman ho raha hai

achchha laga hai shayad aankhon mein yar apni

aaina dekh kar kuchh hairan ho raha hai

gul dekh kar chaman mein tujh ko khila hi ja hai

yani hazar ji se qurban ho raha hai

haal-e-zabun apna poshida kuchh na tha to

sunta na tha ki ye said be-jaan ho raha hai

zalim idhar ki sudh le jun sham-e-subh-gahi

ek aadh dam ka aashiq mehman ho raha hai

qurban-gah-e-mohabbat wo ja hai jis mein har su

dushwar jaan dena aasan ho raha hai

har shab gali mein us ki rote to rahte ho tum

ek roz 'mir' sahab tufan ho raha hai