be-zaban kaliyon ka dil maila kiya

be-zabāñ kaliyoñ kā dil mailā kiyā

ai havā-e-sub.h tū ne kyā kiyā

kī atā har gul ko ik rañgīñ qabā

bū-e-gul ko shahr meñ rusvā kiyā

kyā tujhe vo sub.h-e-kāzib yaad hai

raushnī se tū ne jab parda kiyā

be-ḳhayālī meñ sitāre chun liye

jagmagātī raat ko andhā kiyā

jaate jaate shaam yak-dam hans paḌī

ik sitāra der tak royā kiyā

ruuTh kar ghar se gayā tū kitnī baar

kyā dar-o-dīvār ne pīchhā kiyā

apnī uryānī chhupāne ke liye

tū ne saare shahr ko nañgā kiyā

be-zaban kaliyon ka dil maila kiya

ai hawa-e-subh tu ne kya kiya

ki ata har gul ko ek rangin qaba

bu-e-gul ko shahr mein ruswa kiya

kya tujhe wo subh-e-kazib yaad hai

raushni se tu ne jab parda kiya

be-KHayali mein sitare chun liye

jagmagati raat ko andha kiya

jate jate sham yak-dam hans paDi

ek sitara der tak roya kiya

ruTh kar ghar se gaya tu kitni bar

kya dar-o-diwar ne pichha kiya

apni uryani chhupane ke liye

tu ne sare shahr ko nanga kiya