bechain wo rahta hai mere pas se ja ke

bechain vo rahtā hai mire paas se jā ke

dekhā hai ka.ī baar mujhe us ne bhulā ke

aane se tire rañg badal degī tamannā

alfāz badal jā.eñge ai dost duā ke

ye barq ye gul aur chamakte hue taare

sab jalve haiñ ye aap ke hañsne kī adā ke

maiñ ne bhī batāyā ki mirā hausla kyā hai

tevar to bahut tez the tūfān-e-balā ke

zāhir hue jab rāz-e-mohabbat to ḳhalish kyā

jaatā hai to jaa.e koī dāman ko chhuḌā ke

ham quvvat-e-parvāz meñ saanī nahīñ rakhte

toḌe haiñ jo dar band the ham ne hī ḳhalā ke

ye maan liyā ham to haiñ nākām-e-mohabbat

tum aur kisī se bhī dikhāo to nibhā ke

bebāk nigāhoñ meñ mirī aisī kashish thī

vo bhuul ga.e aaj to andāz hayā ke

in āñkhoñ meñ aañsū the mirā haal jo dekhā

manzil ne qadam chuum liye aabla pā ke

vo roz 'suhail' ek na.ī chheḌ kare hai

vo yūñhī bigāḌegā mirī baat banā ke

bechain wo rahta hai mere pas se ja ke

dekha hai kai bar mujhe us ne bhula ke

aane se tere rang badal degi tamanna

alfaz badal jaenge ai dost dua ke

ye barq ye gul aur chamakte hue tare

sab jalwe hain ye aap ke hansne ki ada ke

main ne bhi bataya ki mera hausla kya hai

tewar to bahut tez the tufan-e-bala ke

zahir hue jab raaz-e-mohabbat to KHalish kya

jata hai to jae koi daman ko chhuDa ke

hum quwwat-e-parwaz mein sani nahin rakhte

toDe hain jo dar band the hum ne hi KHala ke

ye man liya hum to hain nakaam-e-mohabbat

tum aur kisi se bhi dikhao to nibha ke

bebak nigahon mein meri aisi kashish thi

wo bhul gae aaj to andaz haya ke

in aankhon mein aansu the mera haal jo dekha

manzil ne qadam chum liye aabla pa ke

wo roz 'suhail' ek nai chheD kare hai

wo yunhi bigaDega meri baat bana ke