bedar ho gae hain jo KHwab-e-giran se hum

bedār ho ga.e haiñ jo ḳhvāb-e-girāñ se ham

aage nikal ga.e haiñ zabān-o-makāñ se ham

lag jā.egī Thikāne kabhī ḳhāk-e-zindagī

lipTe raheñge gard-e-pas-e-kārvāñ se ham

manzil bhī thī nigāh meñ gard-o-gubār-e-rāh

le kar chale jo izn-e-safar kahkashāñ se ham

us sañg-e-āstāñ pe jhukā kar jabīn-e-shauq

lo be-niyāz ho ga.e donoñ-jahāñ se ham

maanā nahīñ hai yuuñ hī hamāre vajūd ko

Takrā.e haiñ zamīñ se kabhī āsmāñ se ham

āġhāz-o-intihā kī haqīqat se be-ḳhabar

sharh-e-hayāt karte rahe darmiyāñ se ham

kyā pūchhte ho gardish-e-taqdīr-e-kārvāñ

pahuñche vahīñ pe aa ke chale the jahāñ se ham

sajde hī yaad haiñ na tire sañg-e-dar kā hosh

sar bhī jhukā ke duur rahe āstāñ se ham

kuchh bhī na thā 'razā' vo ba-juz dūd-e-āh-e-shauq

ta.abīr jis ko karte rahe āsmāñ se ham

bedar ho gae hain jo KHwab-e-giran se hum

aage nikal gae hain zaban-o-makan se hum

lag jaegi Thikane kabhi KHak-e-zindagi

lipTe rahenge gard-e-pas-e-karwan se hum

manzil bhi thi nigah mein gard-o-gubar-e-rah

le kar chale jo izn-e-safar kahkashan se hum

us sang-e-astan pe jhuka kar jabin-e-shauq

lo be-niyaz ho gae donon-jahan se hum

mana nahin hai yun hi hamare wajud ko

Takrae hain zamin se kabhi aasman se hum

aaghaz-o-intiha ki haqiqat se be-KHabar

sharh-e-hayat karte rahe darmiyan se hum

kya puchhte ho gardish-e-taqdir-e-karwan

pahunche wahin pe aa ke chale the jahan se hum

sajde hi yaad hain na tere sang-e-dar ka hosh

sar bhi jhuka ke dur rahe aastan se hum

kuchh bhi na tha 'raza' wo ba-juz dud-e-ah-e-shauq

tabir jis ko karte rahe aasman se hum