bewafa aise to hargiz na the pahle hum log

bevafā aise to hargiz na the pahle ham log

ek hī shahr meñ rah kar nahīñ milte ham log

jis tarah jiinā thā aise hī jo jiite ham log

jis tarah marte haiñ aise nahīñ marte ham log

ḳhidmat-e-ḳhalq meñ jis shaḳhs kī guzrī hai hayāt

aise insāñ kī ayādat ko na pahuñche ham log

amn kā qāfila kartā rahā minnat phir bhī

chand lamhoñ ko bhī ḳhāmosh na baiThe ham log

itnā ehsān jatāte haiñ ki mar jaatā hai

kaam aa jaa.eñ jo duniyā meñ kisī ke ham log

toḌ detī hai zarā-bhar meñ charāġhoñ kā ġhurūr

ai havā dekh chuke haiñ tire jalve ham log

bewafa aise to hargiz na the pahle hum log

ek hi shahr mein rah kar nahin milte hum log

jis tarah jina tha aise hi jo jite hum log

jis tarah marte hain aise nahin marte hum log

KHidmat-e-KHalq mein jis shaKHs ki guzri hai hayat

aise insan ki ayaadat ko na pahunche hum log

amn ka qafila karta raha minnat phir bhi

chand lamhon ko bhi KHamosh na baiThe hum log

itna ehsan jatate hain ki mar jata hai

kaam aa jaen jo duniya mein kisi ke hum log

toD deti hai zara-bhar mein charaghon ka ghurur

ai hawa dekh chuke hain tere jalwe hum log